ޒުވާން ހުނަރުވެރި ކުޅުންތެރިޔާ އީތަން އިބްރާހިމް ޒަކީ ނިއު ރޭޑިއަންޓް ސްޕޯޓްސް ކްލަބަށް ސޮއިކޮށްފައިވާ ކަމަށް ބުނެ ބައެއް މީޑިއާތަކުން ފަތުރަމުންދާ ޚަބަރުތަކަކީ ހަގީގަތާ ޚިލާފު ވާހަކަތަކެއް ކަމަށް އެ ކްލަބުގެ ޗެއާމަން ހާމަކުރައްވައިފިއެވެ. ނިއު ރޭޑިއަންޓުން ބުނީ އީތަންއަކީ އެ ކްލަބުން ވަރަށް ބޮޑަށް ބޭނުންވާ އަދި ޓީމުގެ ކުރިމަގުގެ ޕްލޭންތަކުގައި ހިމެނޭ މުހިންމު ކުޅުންތެރިއެއް ކަމަށެވެ.

ކްލަބުގެ ޗެއާމަން ވިދާޅުވީ އީތަންގެ ސޮއި ހޯދުމަށްޓަކައި ކްލަބުން މިހާރުވެސް އަންނަނީ މަޝްވަރާތައް ކުރަމުން ކަމަށެވެ. ނަމަވެސް، މިހާތަނަށް އެއްބަސްވުމެއްގައި ސޮއިކޮށްފައި ނުވާއިރު، މީޑިއާގައި މިފަދަ ދޮގު މައުލޫމާތުތައް ދައުރުވުމަކީ ޓީމުން ރާވާފައިވާ މުހިންމު ޕްލޭންތަކަށް ބޮޑެތި ހުރަސްތަކެއް އެޅި، ކްލަބަށް ގެއްލުންވާނެ ކަމެއްކަން އޭނާ ފާހަގަކުރެއްވިއެވެ. އެހެންކަމުން، ކްލަބުގެ ރަސްމީ މަސްދަރުތަކުން މައުލޫމާތު ސާފުކުރުމަށް ހުރިހާ ފަރާތްތަކަށް ވަނީ އިލްތިމާސްކޮށްފައެވެ.

Ad by Hajj Corporation

އީތަން ޒަކީ: ރާއްޖޭގެ އުއްމީދީ ތަރިއެއް

އީތަން އިބްރާހިމް ޒަކީއަކީ ރާއްޖޭގައި އުފެދުނު އެންމެ އުއްމީދީ ޒުވާން ފުޓުބޯޅަ ތަރިންގެ ތެރެއިން އެކަކެވެ. އޭނާ ވަނީ އުމުރުން އެންމެ 14 އަހަރާއި 9 މަހުގައި ދިވެހި ޕްރިމިއަރ ލީގުގެ މެޗެއްގައި ލަނޑު ޖަހައި، ލީގު ތާރީހުގައި ލަނޑު ޖެހި އެންމެ ހަގު ކުޅުންތެރިޔާގެ ރެކޯޑް ގާއިމުކޮށްފައެވެ. އޭރު އޭނާ ކުޅެމުންދިޔައީ ކްލަބް ވެލެންސިއާގެ ސީނިއަރ ޓީމަށެވެ.

ބައިނަލްއަގުވާމީ ތަޖުރިބާއަށް ބަލާއިރު، އީތަން ވަނީ ސްޕެއިންގެ ދެވަނަ ޑިވިޝަންގެ ކްލަބެއް ކަމަށްވާ އީއެފް ހުއެސްކާގެ 16 އަހަރުން ދަށުގެ ޓީމަށް އެއް އަހަރު ދުވަހުގެ އެއްބަސްވުމެއްގެ ދަށުން ކުޅެފައެވެ. މީގެ އިތުރުން، އޭނާއަކީ ޒުވާން ގައުމީ ޓީމުތަކުގެ އިތުރުން ސީނިއަރ ގައުމީ ޓީމުގެ ޕްރިލިމިނަރީ ސްކޮޑުގައި ވެސް ހިމެނިފައިވާ ކުޅުންތެރިއެކެވެ.

މައިގަނޑު ގޮތެއްގައި ފޯވަޑް އަދި ވިންގަރަކަށް ކުޅޭ އީތަންއަކީ ބޯޅަ ގެންގުޅުމާއި ގޯލަށް ނުރައްކާކުރުމުގައި ފާހަގަކޮށްލެވޭ ފަދަ ހުނަރުވެރި ކުޅުމެއް ދައްކަމުން އަންނަ ކުޅުންތެރިއެކެވެ. ނިއު ރޭޑިއަންޓުން އީތަން ހޯދުމަށް މަސައްކަތް ކުރަމުންދަނީ ކުރިއަށް އޮތް ސީޒަނަށް ޓީމު ވަރުގަދަކުރުމުގެ ގޮތުންނެވެ.