ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އިން އިންތިޒާމުކޮށްގެން ބާއްވާ ކަޕް ވިނާސް ކަޕްގެ ފައިނަލުން ނިއުރޭޑިއަންޓް ސްޕޯޓްސް ކްލަބް ޖާގަ ހޯދައިފިއެވެ. ނިއުރޭޑިއަންޓުން ފައިނަލުގެ ޖާގައެއް ކަށަވަރުކުރީ ރޭ ކުޅުނު މެޗުގައި އޮޑި ސްޕޯޓްސް ކްލަބްގެ މައްޗަށް 5-3 ގެ ނަތީޖާއަކުން ކުރިހޯދައިގެންނެވެ. މި ނަތީޖާއާއެކު މާޒިޔާ ސްޕޯޓްސް އެންޑް ރެކްރިއޭޝަނަށް ވެސް ވަނީ ފައިނަލުގެ ޖާގަ ކަށަވަރުވެފައެވެ.

މި މެޗުގައި ނިއުރޭޑިއަންޓްގެ ބްރެޒިލް ފޯވާޑް ޑޮރިއެލްޓަން ގޯމޭޒް ނަސިމެންޓޯ ވަނީ ހެޓްރިކެއް ހަދާފައެވެ. މިއީ މި މުބާރާތުގައި އޭނާ ޖެހިޖެހިގެން ހެދި ދެވަނަ ހެޓްރިކެވެ. މެޗުގެ ހަތަރުވަނަ މިނިޓާއި 19 ވަނަ މިނިޓުގައި ލަނޑު ޖަހައި ޑޮރިއެލްޓަން ނިއުއަށް ލީޑު ނަގައިދިންއިރު، އޭނާގެ ހެޓްރިކް ފުރިހަމަކުރީ 51 ވަނަ މިނިޓުގައެވެ. މިއީ މި މުބާރާތުގައި އޭނާ ކާމިޔާބުކުރި ހަވަނަ ގޯލެވެ.

Ad by Hajj Corporation

ނިއުރޭޑިއަންޓްގެ އަނެއް ދެ ލަނޑު ކާމިޔާބުކޮށްދިނީ އީތާން އިބްރާހީމް ޒަކީ އާއި އަމްދާން އަލީއެވެ. އީތާންގެ މި ލަނޑަކީ މި ސީޒަނުގައި ނިއުއާ ގުޅުނު ފަހުން އޭނާ ކާމިޔާބުކުރި ފުރަތަމަ ލަނޑެވެ. އޮޑި ސްޕޯޓްސް ކްލަބުން މެޗުގެ ފަހުކޮޅު ތިން ލަނޑު ޖަހައި ފަރަގު ކުޑަކުރިއެވެ. އެ ޓީމުގެ ލަނޑުތައް ޖަހައިދިނީ އިބްރާހީމް ވަހީދު ހަސަން، މުޒްދާން އަދި މުހައްމަދު ޝަޚާއު އެވެ.

ކަޕް ވިނާސް ކަޕަކީ އެންމެ ފަހުން 2008 ވަނަ އަހަރު ބޭއްވުމަށްފަހު އަލުން މިއަހަރު ބާއްވަން ފެށި މުބާރާތެކެވެ. 2008 ވަނަ އަހަރުގެ ޗެމްޕިއަން ޓީމަކީ ވެސް ނިއުރޭޑިއަންޓެވެ. މިފަހަރުގެ މުބާރާތުގައި ވާދަކުރަނީ ދިވެހި ޕްރިމިއާ ލީގުގެ ގަދަ ހަތަރު ޓީމު ކަމަށްވާ މާޒިޔާ، ނިއުރޭޑިއަންޓް، އޮޑި ސްޕޯޓްސް އަދި ބުރު ސްޕޯޓްސް ކްލަބެވެ.

ލީގު އުސޫލުން ކުޅޭ މި މުބާރާތުގައި ނިއުރޭޑިއަންޓާއި މާޒިޔާއަށް ފައިނަލުގެ ޖާގަ ކަށަވަރުވީ ބާކީ އެއް މެޗު އޮއްވައެވެ. މުބާރާތުގެ ލީގު ބުރުގެ ފަހު މެޗުގައި ބައްދަލުކުރާނީ ވެސް މި ދެ ޓީމެވެ. ފައިނަލް މެޗުގެ ކުރިން މި ދެ ޓީމު ބައްދަލުކުރާ މެޗު ވެގެންދާނީ ފައިނަލުގެ ކުރިން ދެ ޓީމުގެ ފެންވަރު ވަޒަންކޮށްލަން ލިބޭނެ ރަނގަޅު ފުރުސަތަކަށެވެ.