އީރާނާއެކު އެއްބަސްވުމަކަށް އާދެވޭނެ ކަމުގެ އުންމީދު ބޮޑުކަން ހާމަކުރައްވައި، މިހާރު ކުރިއަށްދާ ހަނގުރާމަ ނިމުމަކަށް އައުމުގެ "ވަރަށް ރަނގަޅު ފުރުސަތެއް" އެބައޮތް ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެއެވެ.

''ޕީބީއެސް'' ނިއުސްއަށް ދެއްވި ފޯނު އިންޓަވިއުއެއްގައި ޓްރަމްޕް ވިދާޅުވީ، އީރާނުން އުފައްދާފައިވާ މަތީ ދަރަޖައިގެ ފުރާނާފައިވާ ޔުރޭނިއަމް އެމެރިކާއަށް ފޮނުވުމަކީ މި އެއްބަސްވުމުގެ ބައެއް ކަމަށެވެ.

Ad by Hajj Corporation

ޓްރަމްޕް ވިދާޅުވީ އެމެރިކާއިން އެއްބަސްވުމަކާ ގާތްވަމުންދާ ކަމަށް ގަބޫލުކުރެއްވޭ ކަމަށެވެ. ނަމަވެސް، މީގެ ކުރިން ވެސް އެފަދަ އިހުސާސެއް ކުރެވުނުކަން ފާހަގަކުރައްވައި، ކަންތައް ވާގޮތް ބަލަން ޖެހޭނެ ކަމަށް އެމަނިކުފާނު ވިދާޅުވިއެވެ. އަދި އަންނަ ހަފުތާގައި ޗައިނާއަށް ކުރައްވާ ދަތުރުފުޅުގެ ކުރިން އެއްބަސްވުމަކަށް އާދެވިދާނެ ކަމަށް ވެސް ޓްރަމްޕް ލަފާކުރެއްވިއެވެ.

މި އެއްބަސްވުމުގެ ދަށުން އީރާނުގެ ބިމުގެ އަޑީގައި ހުންނަ ނިއުކްލިއާ މަރުކަޒުތައް ހިންގުން ހުއްޓާލުމަށް ވެސް ވަނީ ހުށަހަޅާފައެވެ.

 "އަހަރެން ދެކޭގޮތުގައި މިއީ ނިމުމަކަށް އައުމުގެ ވަރަށް ބޮޑު ފުރުސަތެއް އޮތް ކަމެއް. އެކަން ނުނިމިއްޖެނަމަ، އަނެއްކާވެސް އެމީހުންނަށް ވަރުގަދަ ހަމަލާތަކެއް ދޭން ޖެހޭނެ"  ޓްރަމްޕް ވިދާޅުވެފަވެއެވެ.

މަޝްވަރާތަކަށް ހާއްސަ މަންދޫބުން ކަމަށްވާ ސްޓީވް ވިޓްކޮފް އަދި ޖެރެޑް ކުޝްނާ ފޮނުވުމަކީ ނާދިރު ކަމެއް ކަމަށް ޓްރަމްޕް ވިދާޅުވިއެވެ. އޭގެ ބަދަލުގައި އެމެރިކާގައި ތިބެގެން ކަންކަން ނިންމާލެވޭނެ ކަމަށާއި، ފަހަރުގައި އެއްބަސްވުމުގައި ސޮއިކުރުމުގެ ރަސްމިއްޔާތެއް ކޮންމެވެސް ތަނެއްގައި ބޭއްވިދާނެ ކަމަށް އެމަނިކުފާނު ވިދާޅުވިއެވެ.

މީގެ އިތުރުން، ހޯމްރޫޒް ކަނޑުއޮޅިން ދަތުރުކުރާ ވިޔަފާރި އުޅަނދުފަހަރަށް ހިމާޔަތް ދިނުމުގެ މިޝަން ވަގުތީ ގޮތުން މެދުކަނޑާލާފައިވާ ކަން ވެސް ޓްރަމްޕް ވަނީ ހާމަކުރައްވާފައެވެ. މިއީ ދެ ގައުމުގެ ދެމެދުގައި އެއްބަސްވުމަކާ ގާތްވަމުންދާތީ ނިންމި ނިންމުމެއް ކަމަށް އެމަނިކުފާނު ވިދާޅުވިއެވެ.

ވައިޓް ހައުސްގެ ބޯލްރޫމް މަޝްރޫއާ ގުޅޭގޮތުން ކުރެވޭ ފާޑުކިޔުންތަކަށް ރައްދު ދެއްވަމުން ޓްރަމްޕް ވިދާޅުވީ، އެއީ ކުރާ މަސައްކަތްތަކާ އަޅާބަލާއިރު ވަރަށް ކުޑަ މިންވަރެއް ކަމަށެވެ. އަދި އެ މަޝްރޫއަށް އަމިއްލަ ފައިސާ ވެސް ހަރަދު ކުރައްވާ ކަމަށް ވިދާޅުވިއެވެ. މި މަޝްރޫއުގެ އަގު މިހާރު ވަނީ 200 މިލިއަން ޑޮލަރުން 400 މިލިއަން ޑޮލަރަށް އަރާފައެވެ.