ނާސާގެ ސައިންސްވެރިއަކު ވަނީ އޭނާ އެއްފަހަރު ނޫން ކަމަށާއި، ތިން ފަހަރަށް މަރުވި ކަމަށާއި، ކޮންމެ ފަހަރަކުވެސް ފެނުނީ ހަމަ އެއް މަންޒަރެއް ކަމަށް ބުނެފައެވެ.

އިންސާނަކު މަރުވާނީ އެއް ފަހަރުއެވެ. މި ސައިންސް ވެރިޔާ ތިން ފަހަރު މަރުވިކަމަށް ބުނެފައި ވަނީ އޭނާގެ ދަތުރުގައި ކުރެވުނު ތަޖުރިބާތަކެއް ސިފަކޮށްދިނުމަށް މަޖާޒީ ގޮތެއްގައެވެ.

Ad by Hajj Corporation

ނާސާގައި މަސައްކަތް ކުރައްވާފައިވާ އޯޝަނޯގްރަފަރެއް ކަމަށްވާ އުމުރުން 55 އަހަރުގެ އިންގްރިޑް ހޮންކާލާ ބުނި ގޮތުގައި، އޭނާގެ އުމުރުން ދެ އަހަރުގައާއި، 25 އަހަރުގައާއި އަދި 52 އަހަރުގައި މަރާ ކުރިމަތިލާންޖެހުނު ތަޖުރިބާތަކެއް ކުރެވުނެވެ.

ކޮންމެ ހާދިސާއެއް ހިނގީ ތަފާތު ގޮތަކަށް ނަމަވެސް، އޭނާ ބުނި ގޮތުގައި އޭގެ ނަތީޖާ އެއްގޮތެވެ: އޭނާއަށް ވަދެވުނީ ބިރުވެރިކަމެއް ނެތް، ވަގުތުގެ އިހުސާސެއް ނެތް، އަދި އަމިއްލަ ހަށިގަނޑާ ވަކިވެފައިވާ ކަމުގެ އިހުސާސް ކުރެވޭ ފުރިހަމަ ހަމަހިމޭންކަމުގެ އާދަޔާ ހިލާފު ހާލަތަކަށެވެ.

ހޮންކާލާ ސިފަކުރި ގޮތުގައި އޭނާ "ސާފު ހޭލުންތެރިކަމަކަށް" ބަދަލުވެ، އަލިކަމާއި، ސާފުކަމާއި އަދި ހަމަޖެހުމުން ފުރިގެންވާ، ހުރިހާ ކަމެއް ގުޅިފައިވާ ބޮޑު އިހުސާސެއްގެ ތެރެއަށް ގެނބިގެން ދިޔައެވެ.

އޭނާ ބުނި ގޮތުގައި މިއީ ކުޑަހިނދުކޮޅެއްގެ ވަހުމެއް ނޫނެވެ. ނަމަވެސް މަރާ ގާތްވި ކޮންމެ ފަހަރަކު އޭނާއަށް ކުރެވުނު އެއްގޮތް ތަޖުރިބާއެކެވެ.

މި ސައިންސްވެރިޔާ މިހާރު ގަބޫލުކުރާ ގޮތުގައި މި ވަގުތުތަކަކީ އިންސާނާގެ ދިރިއުޅުމުގެ ފަހުން އޮތް ކަންތައްތަކުގެ ކުޑަ މަންޒަރެކެވެ.

އޭނާ ބާރުއަޅައި ބުނި ގޮތުގައި އެ ތަޖުރިބާތަކަކީ މި މާއްދީ ދުނިޔޭގައި އޭނާއަށް އިހުސާސް ކުރެވުނު ކޮންމެ ކަމަކަށްވުރެ މާ ހަގީގީ ކަންތައްތަކެކެވެ.

ހޮންކާލާ ބުނި ގޮތުގައި މަރާ އެންމެ ފުރަތަމަ ކުރިމަތިލާން ޖެހުނީ އޭނާގެ އުމުރުން އެންމެ ދެ އަހަރުގައި، ކޮލަމްބިއާގެ ބޮގޯޓާގައި ހުންނަ އޭނާގެ ގޭގައި ހުރި ފިނި ފެން ޓޭންކަކަށް ވެއްޓުމުންނެވެ.

ކުއްލިއަކަށް ހުރިހާ ކަމެއް ބަދަލުވުމުގެ ކުރިން، ނޭވާލާން އުނދަގޫވެގެން ކުރެވުނު ބިރުވެރިކަމާއި ހާސްކަން އޭނާ ހަނދާން ކުރިއެވެ.

"ބިރުގަތުމުގެ ބަދަލުގައި، އަހަރެންގެ މައްޗަށް ފުން ހަމަހިމޭންކަމެއް އަތްގަދަކުރި،" އޭނާ ޖޭމް ޕްރެސްއަށް ކިޔައިދިނެވެ. "ހާސްކަން ފިލައިގޮސް، އޭގެ ބަދަލުގައި އާދަޔާ ހިލާފު އަމާންކަމާއި ހަމަހިމޭންކަމެއް އިހުސާސްވި."

އޭނާ އެ ވަގުތު ސިފަކުރީ އޭނާގެ ހޭލުންތެރިކަން ހަށިގަނޑާ ވަކިވެ، ފެނުގެ ތެރޭގައި ފުރާނަ ނެތް މަސްގަނޑެއްގެ ގޮތުގައި އޮތް އަމިއްލަ ހަށިގަނޑު ފެންނަ ފަދަ ގޮތަކަށެވެ.

"އެ ވަގުތު، އަހަރެންނަށް އިހުސާސް ކުރެވުނީ ހަށިގަނޑެއްގެ ތެރޭގައި އިން ކުއްޖެއްގެ ގޮތުގައެއް ނޫން. އެކަމަކު ސާފު ހޭލުންތެރިކަމެއް، އަލިކަމެއްގެ ގޮތުގައި،" ހޮންކާލާ ބުންޏެވެ.

އޭނާ ބުނި ގޮތުގައި، ބިރުވެރިކަމާއި، ވިސްނުންތަކާއި، އަދި އަމިއްލަ ނަފްސުގެ އިހުސާސާ އެކު ވަގުތުވެސް މުޅިން ހުއްޓުނު ކަހަލައެވެ.

އޭގެ ބަދަލުގައި، އޭނާގެ ވަށައިގެންވާ ހުރިހާ ކަމަކާ މުޅިން ގުޅިފައިވާ ކަމުގެ އިހުސާސް ކުރެވުނެވެ.

"އެއީ ލޯތްބާއި، ސާފުކަމާއި އަދި ހަމަޖެހުމުން ފުރިގެންވާ ބޮޑު އިލްމެއްގެ ތެރެއަށް ގެނބިގެން ދިޔުން ކަހަލަ ކަމެއް،" އޭނާ ކިޔައިދިނެވެ.

އޭނާގެ ވާހަކައިގެ އެންމެ އާދަޔާ ހިލާފު އެއް ބަޔަކީ، އެތައް ބްލޮކެއް ދުރުގައި ހުރި އޭނާގެ މަންމަ ފެންނަ ކަމަށާއި، ވާހަކަ ނުދައްކާ މަންމައާ މުއާމަލާތް ކުރެވޭ ކަމަށް ހޮންކާލާ ބުނި ބުނުމެވެ.

އޭނާގެ މަންމަ ފަހުން އަވަހަށް ގެއަށް އައިސް، ފެންގަނޑު ތެރޭގައި ހޭނެތިފައި އޮތް ދަރިފުޅު ފެނުނެވެ. ހޮންކާލާ ބުނި ގޮތުގައި މިއީ އެ ތަޖުރިބާގެ ތެރޭގައި އޭނާއަށް ފެނުނު ކަންތައްތަކާ ދިމާވާ ތަފްސީލެކެވެ.

މި ހާދިސާގެ ސަބަބުން އޭނާގެ ދިރިއުޅުން މުޅިން ބަދަލުވި ކަމަށް އޭނާ ބުންޏެވެ. "އެ ދުވަހުން ފެށިގެން، އަހަރެން ދެން މަރުދެކެ ބިރެއް ނުގަނޭ،" އޭނާ ބުންޏެވެ.

ހޮންކާލާއަށް އޭގެ ފަހުންވެސް ދިރިއުޅުމުގައި ދެ ފަހަރަކު މަރާ ކުރިމަތިލާން ޖެހުނެވެ. އެއީ އުމުރުން 25 އަހަރުގައި ހިނގި ސައިކަލު އެކްސިޑެންޓެއްގައާއި، އަދި 52 އަހަރުގައި ސާޖަރީއެއްގެ ތެރޭގައި ލޭގެ ޕްރެޝަރު ދަށްވުމުގެ ސަބަބުންނެވެ.

މި ހާދިސާތައް ހިނގި ގޮތް ތަފާތު ނަމަވެސް، އޭނާ ބުނި ގޮތުގައި ކޮންމެ ތަޖުރިބާއަކުންވެސް އޭނާ ގެންގޮސްދިނީ ހަމަ އެއް ތަނަކަށެވެ.އޭނާ ބުނާ ގޮތުގައި، ކޮންމެ ފަހަރަކުވެސް އޭނާއަށް ވަދެވެނީ އަމިއްލަ ހަށިގަނޑުން ބޭރުގައިވާ، އަމާން އަދި ހޭލުންތެރިކަން އިހުސާސްކޮށްދޭ ހާލަތަކަށެވެ.

މަރުގެ ތަޖުރިބާތަކަކީ އިންތިހާ ދަރަޖައިގެ ބިރުވެރިކަމާއި ނުތަނަވަސްކަމުގެ ތެރޭގައި ސިކުނޑިއަށް އަންނަ ބަދަލުތަކެއްގެ ނަތީޖާ ކަމަށް ގިނަ ސައިންސްވެރިން ބުނި ނަމަވެސް، ހޮންކާލާ ގަބޫލުކުރާ ގޮތުގައި މިއީ މިއަށްވުރެ މާ ފުން މާނައެއް އެކުލެވޭ ކަމެކެވެ.

"މި ތަޖުރިބާތަކުގެ ސަބަބުން ދިރިއުޅުމާ މެދު އަހަރެން ދެކޭގޮތް މުޅިން ބަދަލުވެއްޖެ،" އޭނާ ބުންޏެވެ.

"އަހަރެމެންނަކީ ދިރިހުރުމަށްޓަކައި އެކަނިވެރިކަމާއެކު މަސައްކަތްކުރާ ވަކިވަކި ފަރުދުންތަކެއްގެ ގޮތުގައި ދެކުމުގެ ބަދަލުގައި، އަހަރެމެންނަކީ އިންސާނީ ސިފައެއްގައި ދިރިއުޅުން ތަޖުރިބާކުރަމުންދާ 'ކޮންޝަސްނަސް' ނުވަތަ ހޭލުންތެރިކަމުގެ ހިއްސާ އެކުލެވޭ ބައެއްކަން އަހަންނަށް ވިސްނެން ފެށި."

މަރަކީ ނިމުން ނޫން ކަމަށާއި، އެއީ އެއް ހާލަތުން އަނެއް ހާލަތަށް ބަދަލުވުން ކަމަށް އޭނާ މިހާރު ގަބޫލުކުރެއެވެ. "އެ ނަޒަރިއްޔާއިން ބަލާއިރު، މަރަކީ ދިރިހުރުން ނިމުމެއް ނޫން. އެއީ ހޭލުންތެރިކަމުގެ މެދުކެނޑުމެއް ނެތް ސިލްސިލާގެ ތެރެއިން އަންނަ ބަދަލެއް،" އޭނާ ބުންޏެވެ.

އޭނާގެ މި އާދަޔާ ހިލާފު ވާހަކަތަކާއެކުވެސް، ހޮންކާލާ ވަނީ ސައިންސްގެ ދާއިރާއިން ކާމިޔާބު ކެރިއަރެއް ބިނާކޮށްފައެވެ.

އޭނާ ވަނީ މެރިން ސައިންސްގެ ދާއިރާއިން ޕީއެޗްޑީ ހާސިލްކޮށް، ތިމާވެށީގެ ދިރާސާތަކުގައި މަސައްކަތްކޮށްފައެވެ. މީގެ ތެރޭގައި ނާސާ އާއި އެމެރިކާގެ ނޭވީއާ ގުޅިގެން ކުރި މަސައްކަތްތައް ހިމެނެއެވެ. އޭނާ އިތުރަށް ބުނި ގޮތުގައި، އޭނާ ކުރި މަރުގެ ތަޖުރިބާތަކުގެ ސަބަބުން، ސައިންސްގެ އަލީގައި ހަގީގަތް ހޯދުމަށް އޭނާގެ ހިތުގައި އޮތް ޝައުގުވެރިކަން އިތުރަށް ވަރުގަދަވިއެވެ.

"އަހަރެން ބޭނުންވީ އޮބްޒަވޭޝަން ނުވަތަ ބެލުންތަކާއި ދިރާސާތަކުގެ އެހީގައި ހަގީގަތުގެ އަސްލު ދެނެގަންނަން،" އޭނާ ކިޔައިދިނެވެ.

ގިނަ އަހަރުތަކެއް ވަންދެން އޭނާގެ މި ތަޖުރިބާތައް ސިއްރުކޮށްގެން ހުރި ނަމަވެސް، ސައިންސާއި ރޫހާނިއްޔަތަކީ އެކަތި އަނެކައްޗާ ފުށުއަރާ ކަންތައްތަކެއް ނޫން ކަމަށް އޭނާ މިހާރު ގަބޫލުކުރެއެވެ.

އޭގެ ބަދަލުގައި، އޭނާ ވަކާލާތު ކުރަނީ އެ ދެ ދާއިރާއިންވެސް މަސައްކަތް ކުރަނީ ތަފާތު ގޮތްގޮތުން އެއް ސުވާލުތަކެއްގެ ޖަވާބު ހޯދުމަށް ކަމަށެވެ.

އޭނާގެ ކުރިއަށް އޮތް ފޮތް، "Dying to See the Light: A Scientist's Guide to Reawakening" ގައި، އޭނާގެ ތަޖުރިބާތަކާއި، އިންސާނީ ހޭލުންތެރިކަމާ މެދު އެ ތަޖުރިބާތަކުން ދޭހަކޮށްދޭ މާނަތަކުގެ މައްޗަށް ފުންކޮށް ބަލާލާފައިވެއެވެ.