ދެކުނު އެމެރިކާ ސަރަހައްދުގެ ކްރޫޒް ލައިނަރަކުން ހަންޓާ ވައިރަސް ފެނުނު ނަމަވެސް، ރާއްޖެއަށް އެ ބަލީގެ ރިސްކު އޮތީ ވަރަށް ކުޑަކޮށް ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ބުނެފިއެވެ.

Ad by Hajj Corporation

އެޗްޕީއޭއިން ސޯޝަލް މީޑިއާގައި ހިއްސާކުރި ޕޯސްޓެއްގައި ބުނީ، ދެކުނު އެމެރިކާ ސަރަހައްދުގައި ދަތުރުކުރަމުން އަންނަ ކްރޫޒް ލައިނަރަކުން ހަންޓާ ވައިރަސް ފެނުމާ ގުޅިގެން ދުނިޔޭގެ ސިއްހަތު ޖަމިއްޔާ (ޑަބްލިޔުއެޗްއޯ) މެދުވެރިކޮށް އެ ހާލަތު މޮނިޓާ ކުރަމުންދާ ކަމަށެވެ. އެ އެޖެންސީން ބުނި ގޮތުގައި މިހާތަނަށް ރާއްޖެއިން މި ބަލީގެ އެއްވެސް ކޭސްއެއް ނުވަތަ ބަލިޖެހިފައިވާ މީހަކާ ދިމާވި ކޮންޓެކްޓެއް ވެސް ފެނިފައެއް ނުވެއެވެ.

އެޗްޕީއޭއިން ބުނީ ބައްޔާ ގުޅޭ އެންމެ ފަހުގެ މައުލޫމާތު ލިބެމުންދާ ވަރަކުން އާންމުންނާ ހިއްސާ ކުރަމުންދާނެ ކަމަށެވެ.

ހަންޓާ ވައިރަހަކީ މައިގަނޑު ގޮތެއްގައި މީދަލާއި އެ ފަދަ ޖަނަވާރުގެ ޒަރީއާއިން ފެތުރޭ ވައިރަހެކެވެ. އިންސާނުންނަށް މި ވައިރަސް ޖެހެނީ މީދަލުގެ ކުޑަކަމުދާ ތަކެއްޗާއި ކުޅާއި ނަޖިހުގައި އަތްލެވިގެން ނުވަތަ ވައި ނުވަންނަ ބަންދު ތަންތަނުގައި ހުންނަ އެ ތަކެތީގެ ޕާޓިކަލްސް ނޭވާލުމުގެ ތެރެއިން ހަށިގަނޑަށް ދިއުމުންނެވެ. ޑަބްލިޔުއެޗްއޯއިން ވަނީ ބައެއް ފަރާތްތަކަށް ނުރައްކާ ބޮޑުވި ނަމަވެސް އާންމު ސިއްހަތަށް އޮތް ނުރައްކާ ކުޑަ ކަމަށް ކަނޑައަޅައިފައެވެ.

އެ ޖަމިއްޔާއިން ހާމަކުރި ގޮތުގައި ބައިނަލްއަގުވާމީ ސިއްހީ ގަވާއިދުތަކުގެ ދަށުން ގައުމުތަކުގެ ސަރުކާރުތަކާ ގުޅިގެން ބަލި ފެތުރުން ހުއްޓުވުމަށް ދަނީ މަސައްކަތް ކުރަމުންނެވެ.