ފުޓްބޯލް ރައިޓާސް އެސޯސިއޭޝަން (އެފްޑަބްލިއުއޭ) އިން ހޮވާ އަހަރުގެ އެންމެ މޮޅު ފިރިހެން ފުޓްބޯޅަ ކުޅުންތެރިޔާގެ މަގާމު މެންޗެސްޓާ ޔުނައިޓެޑްގެ ކެޕްޓަން ބްރޫނޯ ފެނާންޑޭޒް ކާމިޔާބުކޮށްފިއެވެ. އަންހެން ކުޅުންތެރިންގެ ބައިން މި ޝަރަފުވެރި އެވޯޑު ހާސިލްކުރީ މެންޗެސްޓާ ސިޓީގެ ފޯވާޑް ހަދީޖާ ޝޯ އެވެ.

އުމުރުން 31 އަހަރުގެ ފެނާންޑޭޒް މި އެވޯޑު ހާސިލްކުރީ ޕްރިމިއާ ލީގުގެ ތާރީހީ ރެކޯޑަކާ ގާތްވެފައި ވަނިކޮށެވެ. އޭނާ ވަނީ މި ސީޒަނުގައި މިހާތަނަށް 19 އެސިސްޓް ހަމަކޮށްފައެވެ. ލީގުގައި ބާކީ ތިން މެޗު އޮތްއިރު، ތިއެރީ އޮންރީ އާއި ކެވިން ޑި ބްރޭނާ ހަދާފައިވާ 20 އެސިސްޓުގެ ރެކޯޑާ އެއްވަރުކުރުމަށް އޭނާއަށް މިހާރު ބޭނުންވަނީ އެންމެ އެސިސްޓެކެވެ.

Ad by Hajj Corporation

ޔުނައިޓެޑަށް މި ސީޒަނަކީ ގޮންޖެހުންތަކުން ފުރިގެންވާ ސީޒަނެކެވެ. ރޫބެން އަމޮރިމްގެ އިރުޝާދުގެ ދަށުން ސީޒަން ފެށީ ދަށް ނަތީޖާތަކަކާއެކު ނަމަވެސް، އޭނާ ވަކިކޮށް މައިކަލް ކެރިކްއާ ޓީމު ހަވާލުކުރި ފަހުން ޓީމުގެ ކުޅުމަށް ވަނީ ބޮޑު ކުރިއެރުމެއް އައިސްފައެވެ. ފެނާންޑޭޒް ވަނީ މި ސީޒަނުގައި އަށް ލަނޑު ޖަހައި، ޔުނައިޓެޑަށް އަންނަ ސީޒަނުގެ ޗެމްޕިއަންސް ލީގުން ޖާގައެއް ކަށަވަރުކޮށްދިނުމުގައި މުހިންމު ދައުރެއް އަދާކޮށްފައެވެ.

މި އެވޯޑުގެ ދެވަނަ ލިބުނީ އާސެނަލްގައި މޮޅު ކުޅުމެއް ދައްކަމުން އަންނަ ޑެކްލަން ރައިސް އަށެވެ. އަދި ތިންވަނަ ލިބުނީ މެންޗެސްޓާ ސިޓީގެ އާލިން ހާލަންޑް އަށެވެ. 2020 ވަނަ އަހަރު ސްޕޯޓިން ސީޕީ އިން ޔުނައިޓެޑާ ގުޅުނު ފެނާންޑޭޒް ވަނީ މި ސީޒަނުގައި ޕްރިމިއާ ލީގުގައި އޭނާގެ 300 ވަނަ މެޗު ހަމަކޮށްފައެވެ. ފާއިތުވި ހޫނު މޫސުމުގައި ސައުދީ އަރަބިއްޔާގެ އަލް ހިލާލް ފަދަ ކްލަބްތަކުން ބޮޑެތި ހުށަހެޅުންތަކެއް ލިބުނު ނަމަވެސް، އޭނާ ނިންމީ އޯލްޑް ޓްރެފޯޑުގައި މަޑުކުރުމަށެވެ.