ޗެލްސީގެ މިޑްފީލްޑަރު އަންދްރޭ ސަންޓޯސް މެންޗެސްޓަރ ޔުނައިޓެޑަށް ސޮއިކުރުމަށް އެ ދެ ކްލަބުގެ މެދުގައި އެއްބަސްވުމަކަށް އަތުވެފައިވާ ކަމަށް އިތުބާރު ހުރި މަސްދަރުތަކުން ރިޕޯޓްކޮށްފިއެވެ. ދަ އެތުލެޓިކްގެ ޑޭވިޑް އޯންސްޓީން ރިޕޯޓްކުރާ ގޮތުގައި، މި ޒުވާން ކުޅުންތެރިޔާ އޯލްޑް ޓްރެފޯޑަށް ބަދަލުވުމުގެ ހުރިހާ ކަމެއް މިހާރު ވަނީ ނިމުމަކާ ގާތްވެފައެވެ.

މި ޓްރާންސްފާގެ ދަށުން މެންޗެސްޓަރ ޔުނައިޓެޑުން 48 މިލިއަން ޕައުންޑްގެ ފީއެއް ދެއްކުމަށް ވަނީ އެއްބަސްވެފައެވެ. މީގެ އިތުރުން، ފަސޭހައިން ހާސިލްކުރެވޭނެ ބޯނަސްގެ ގޮތުގައި 2 މިލިއަން ޕައުންޑް ދިނުމަށާއި، ކުރިމަގުގައި ސަންޓޯސް އެހެން ކްލަބަކަށް ވިއްކާލައިފިނަމަ ލިބޭ ފައިދާގެ 10 އިންސައްތަ ޗެލްސީއަށް ލިބޭ ގޮތަށްވެސް ވަނީ ހަމަޖެހިފައެވެ.

Ad by Hajj Corporation

ސަންޓޯސް ވަނީ ޔުނައިޓެޑާއެކު އަމިއްލަ އެއްބަސްވުންތަކަށް މިހާރު އާނބަސް ބުނެފައެވެ. ޗެލްސީއާއެކު 2030 ވަނަ އަހަރާ ހަމައަށް ކޮންޓްރެކްޓް އޮތް ނަމަވެސް، އޭނާ ޔުނައިޓެޑަށް ބަދަލުވާން ބޭނުންވަނީ ފުރަތަމަ އެގާރައިން ގަވާއިދުން ފުރުސަތު ހޯދުމަށް ކުރާ މަސައްކަތުގައި ރަނގަޅު ފުރުސަތެއް ލިބޭނެ ކަމަށް ގަބޫލުކުރާތީއެވެ.

ސްޓެމްފޯޑް ބްރިޖުގައި ސަންޓޯސްއަކީ އަދިވެސް މުސްތަގުބަލު އޮތް މުހިންމު ކުޅުންތެރިއެއްގެ ގޮތުގައި ބެލެވުނު ނަމަވެސް، އޭނާ ބޭނުންވަނީ ކުޅުމުގެ ވަގުތު އިތުރުކުރުމަށެވެ. ނިމިދިޔަ ސީޒަނުގައި އޭނާ ވަނީ ޗެލްސީއަށް ހުރިހާ މުބާރާތްތަކެއްގައި 43 މެޗު ކުޅެދީ، ތިން ލަނޑު ޖަހައި ހަތަރު އެސިސްޓް ކާމިޔާބުކޮށްފައެވެ.