އާސެނަލް އިން މި ސީޒަނުގެ އިނގިރޭސި ޕްރިމިއާ ލީގު ކާމިޔާބުކޮށްފިނަމަވެސް، އިސްލިންގްޓަންގައި ބޭއްވުމަށް ހަމަޖެހިފައިވާ ކާމިޔާބީގެ ބޮޑު ހަރަކާތްތައް ބުޑަޕެސްޓްގައި އޮންނަ ޔޫރަޕްގެ ފައިނަލް މެޗަށްފަހު، ޗެންޕިއަންސް ލީގުގެ ތަށި ލިބޭނެ ކަމަށްބަލައި އެތާރީކު ޖެހިގެން އޮންނަ ދުވަހު ދެތަށްޓާއެކު ޕެރޭޑް ބޭއްވުމަށް ވަނީ ތާވަލުކޮށްފައެވެ. މި ޕެރޭޑް ބޭއްވުމަށް ނިންމާފައިވަނީ މެއި މަހުގެ 30 ވާ ހޮނިހިރު ދުވަހު ހަންގޭރީގައި އޮންނަ ފައިނަލް މެޗުގެ އަނެއް ދުވަހުއެވެ.

މިއާއެކު ކްލަބުން ހަމައެކަނި ލީގު ތަށި ކާމިޔާބު ކުރި ނަމަވެސް، ސަޕޯޓަރުންނަށް އުފާފާޅުކުރުމުގެ ޕެރޭޑަށް އިންތިޒާރު ކުރަން ޖެހޭނީ ޔޫރަޕްގެ ފައިނަލް މެޗު ނިމެންދެނެވެ. ހުޅުވާލެވިފައިވާ ބަހެއްގައި ކުރިއަށްގެންދާ މި ޕެރޭޑް، އިސްލިންގްޓަން ޓައުން ހޯލާ ހަމައަށް ދަތުރުކުރާނެ ކަމަށް ބެލެވޭއިރު، މި ހަރަކާތް ފެށުމަށް ހަމަޖެހިފައިވަނީ ހެނދުނު ނުވަތަ މެންދުރުގެ ވަގުތެއްގައެވެ. ރޭގަނޑުގެ ވަގުތެއްގައި ޕެރޭޑް ކުރިއަށް ނުގެންދާނެ ކަމަށް މައުލޫމާތު ލިބެއެވެ.

Ad by Hajj Corporation

މި އަހަރުގެ ޕެރޭޑް ކުރިއަށްދާނެ ވަކި ރޫޓެއް އަދި ރަސްމީކޮށް ކަށަވަރުވެފައި ނުވި ނަމަވެސް، މީގެ ދެ ސީޒަން ކުރިން އާސެނަލް އިން ރޭވި ޕެރޭޑްގެ ރޫޓަށް ބަލާއިރު، އެމިރޭޓްސް ސްޓޭޑިއަމުން ފަށައިގެން ޑްރޭޓަން ޕާކް، އައުބާޓް ޕާކް، ހައިބަރީ ގްރޯވް، ސެއިންޓް ޕޯލްސް ރޯޑް އަދި އަޕާސްޓްރީޓް މަގުން ގޮސް އަނބުރާ ސްޓޭޑިއަމަށް ދާ ގޮތަށް ވަނީ އޮތީ ރޭވިފައެވެ.

މި ހަރަކާތްތަކާ ގުޅިގެން ސަޕޯޓަރުންނަށް ބޮޑު ގޮންޖެހުމަކާ ކުރިމަތިލާން ޖެހޭނެ ކަމަށް ބެލެވެއެވެ. މައިކަލް އާޓެޓާގެ ޓީމު ބުޑަޕެސްޓުން އެނބުރި އިންގްލެންޑަށް އަންނާނީ މެއި 31 ވާ އާދީއްތަ ދުވަހުގެ ފަތިހުގެ ވަގުތެއްގައެވެ. އެހެންކަމުން، ބުޑަޕެސްޓަށް މެޗު ބަލަންދާ ސަޕޯޓަރުންނަށް ވެސް ޕެރޭޑްގައި ބައިވެރިވުމަށްޓަކައި ވަރަށް އަވަހަށް އެނބުރި ގައުމަށް އަންނަން މަޖުބޫރުވާނެއެވެ.

ނަމަވެސް، ފައިނަލް މެޗު ފެށުމަށް ހަމަޖެހިފައިވަނީ އާންމުކޮށް މިފަދަ މެޗުތައް ފަށާ ރޭގަނޑު 8 ޖަހާއިރުގެ ބަދަލުގައި ހަވީރު 5 ޖަހާއިރު ކަމަށްވާތީ، ސަޕޯޓަރުންނަށް އެނބުރި އައުމަށް ކޮންމެވެސް ވަރެއްގެ ލުޔެއް ލިބޭނެއެވެ. މި ހުރިހާ ހަރަކާތްތަކަށްފަހު، އާސެނަލްގެ ގިނަ ކުޅުންތެރިންތަކެއް ވޯލްޑް ކަޕަށް ތައްޔާރުވުމަށް އެ ކުޅުންތެރިންގެ ގައުމީ ޓީމުތަކާ ގުޅުމަށް ވަނީ ހަމަޖެހިފައެވެ.