ނޫސްވެރިންކަމަށް ބުނެ ރައީސުލްޖުމްހޫރިއްޔާގެ އޮފީހުގެ ހުރުމަތް ކެނޑި ފަރާތްތަކާ ދެކޮޅަށް ދައުވާ ކުރެވެންޖެހޭ ކަމަށް ހައްޖު ކޯޕަރޭޝަނުގެ މެނޭޖިންގ ޑިރެކްޓަރު މުހައްމަދު ޝަކީލް ވިދާޅުވެއްޖެއެވެ.

ޝަކީލް ވިދާޅުވީ ނޫސްވެރިކަމުގެ ފާހުގެ ނިވަލުގައި ދައުލަތުގެ އެންމެ މަތީ އެއް އިދާރާގެ ތެރެއަށް ވަންނަން ފުރުސަތު ހޯދައިގެން ސިޔާސީ އެކްޓިވިސްޓުން އުޅޭ ގޮތަށް އުޅޭ ބަޔަކު ޝަރުއީ ކޯޓުތަކުގެ އަމުރަށް ގޮންޖަހައި ރައީސުލްޖުމްހޫރިއްޔާގެ އަބުރުފުޅަށް އަރައިގެންފައިވާ ކަމަށެވެ. އެއީ ޑީމޮކްރެސީއެއް ނޫން ކަމަށާއި ޤާނޫނު އަސާސީންނާއި އިސްލާމީ ޝަރީއާއިން ވެސް އެއްވެސް ބަޔަކަށް ލިބިދީފައިވާ ހައްގުތަކެއް ނޫން ކަމަށް އޭނާ ވިދާޅުވިއެވެ.

Ad by Hajj Corporation

ޝަކީލް އިތުރަށް ވިދާޅުވީ ގައުމުގެ ވީދިފައިވާ އިޖުތިމާއީ ފޭރާން އިއާދަކުރުމަށް މިފަދަ މީހުންނާ ދެކޮޅަށް ދައުވާ ކުރެވި ހައްގު އަދަބު ދެވެންޖެހޭ ކަމަށެވެ.

މިނިވަން ނޫސްވެރިކަމާއި ހިޔާލުފާޅުކުރުމުގެ މިނިވަންކަން ބޭނުންކުރަންވާނީ، އިސްލާމްދީނާއި ޤާނޫނުގެ ޙުދޫދުތަކުގެ ތެރެއިން ކަމަށް އިސްލާމީ ކަންތައްތަކާއި އައުޤާފާ ބެހޭ ވަޒީރު ޑރ.މުހައްމަދު ޝަހީމް އަލީ ސައީދުވެސް މީގެ ކުރިން ވަނީ, އެކްސްގައި ކުރެއްވި ޕޯސްޓެއްގައި ވިދާޅުވެފައެވެ.

މީޑިއާގެ މިނިވަންކަން ޒިންމާދާރުގޮތުގައި ހުދޫދުން ބޭރުނުވާގޮތަށް ހިފުމަށް ބައެއް ފަރާތްތަކުން ގޮވާލަމުންދާއިރު، ރައީސުލްޖުމްހޫރިއްޔާއަށް ބޮޑެތި ތުހުމަތެއް ކޮށް ޑޮކިއުމަންޓްރީއެއް ހެދި މައްސަލާގައި ފުލުހުން ވަނީ ކޯޓުއަމުރެއްގެ ދަށުން އޮންލައިން ނޫހެއްގެ އޮފީސް ބަލާފާސްކޮށްފައެވެ. އެތަން ބަލާ ފާސްކޮށް ބައެއް ތަކެތި ފުލުހުން ވަނީ ގެންގޮސްފައެވެ.