ޤަވާއިދާ ޚިލާފަށް ރާއްޖޭގައި އުޅޭ ބިދޭސީންގެ މައްސަލަ ހައްލުކުރުމަށް ސަރުކާރުން ފަށާފައިވާ "އޮޕަރޭޝަން ކުރަނގި"ގެ ތިންވަނަ ފިޔަވަހީގެ ދަށުން، ރަށްރަށުގެ ދަނޑުތަކުގައި ފިލައިގެން އުޅޭ ބިދޭސީން ހޯދުމަށް ހާއްސަ އިސްކަމެއް ދެއްވާނެ ކަމަށް ދާޚިލީ ސަލާމަތާއި މަސައްކަތްތެރިކަމާއި ފަންނިއްޔާތާ ބެހޭ ވަޒީރު ޢަލީ އިހުސާން ވިދާޅުވެއްޖެއެވެ.

މި މަހުގެ 9 ވަނަ ދުވަހު ފެށި މި ފިޔަވަހީގެ މައިގަނޑު އަމާޒަކީ ރާއްޖޭގެ އެކި ސަރަހައްދުތަކުގައި ފިލައިގެން އުޅޭ މީހުން ދެނެގަނެ، ގާނޫނީ ފިޔަވަޅު އެޅުމެވެ.

Ad by Hajj Corporation

މި އޮޕަރޭޝަންގެ ތެރެއިން މިހާތަނަށް ބަޔޯމެޓްރިކްސް ނުނެގި ތިބި 4,040 ބިދޭސީން މުޅި ރާއްޖޭގައި އަތްފުނާ އަޅައިގެން ހޯދުމަށް ވަނީ ނިންމާފައެވެ. ވަޒީރު ވިދާޅުވި ގޮތުގައި، މި މީހުން ހޯދުމަށްފަހު އަނބުރާ ގައުމަށް ފޮނުވާލުމުގެ މަސައްކަތް ކުރިއަށްދާނެއެވެ. މީގެ އިތުރުން، ގަވައިދާ ހިލާފަށް ވިޔަފާރިކުރާ ބިދޭސީންނާއި، ކަންމަތީ ފިހާރަތަކާއި މާރުކޭޓު ގޮޅިތައް ހިންގާ ބިދޭސީން ހޯދުމަށްވެސް ހާއްސަ ސަމާލުކަމެއް ދޭނެއެވެ.

މި މަސައްކަތާ ގުޅޭގޮތުން ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ވިދާޅުވީ، މި ސަރުކާރު ހަވާލުވިއިރު ގަވައިދާ އެއްގޮތަށް ތިބީ އެންމެ 20 އިންސައްތަ ބިދޭސީން ކަމަށާއި، ނަމަވެސް މިހާރު އެ އަދަދު 63 އިންސައްތައަށް އިތުރުކުރެވިފައިވާ ކަމަށެވެ. އަދި އެކްޓިވް ވޯކްޕާމިޓްގައި ތިބި މީހުންގެ ތެރެއިން 98 އިންސައްތަ މީހުންގެ ބަޔޯމެޓްރިކްސް މިހާރު ވަނީ ނިމިފައެވެ. "މި އަދަދު 17 ނޮވެމްބަރު 2023 ގައި ހުރީ އެންމެ 13 އިން ސައްތައިގައި،" ރައީސް ފާހަގަކުރެއްވިއެވެ.

ކުރިއަށް އޮތް 6 މަސް ދުވަހުގެ ތެރޭގައި ކުރެވޭނެ އެންމެ މުހިންމު މަސައްކަތަކީ ބާކީ ތިބި މީހުން ހޯދައި ރާއްޖެއިން ޑިޕޯޓުކުރުން ކަމަށް ރައީސް ވިދާޅުވިއެވެ. މި އޮޕަރޭޝަންގެ ސަބަބުން، ގަވައިދާ ހިލާފަށް އުޅޭ ބިދޭސީންގެ ސަބަބުން ދިމާވާ ނުރައްކާތެރި ހާދިސާތަކުގައި އެމީހުންނަކީ ކޮބައިކަން ނޭނގޭ މައްސަލައަށް ދާއިމީ ހައްލެއް ލިބިގެންދާނެއެވެ.

އޮޕަރޭޝަން ކުރަނގީގެ މައިގަނޑު މަޤްޞަދުތައް

މި އޮޕަރޭޝަންގެ މައިގަނޑު ތިން މަޤްޞަދެއް ވަނީ ކަނޑައަޅާފައެވެ. އެއީ ރާއްޖޭގައި އުޅޭ ހުރިހާ ބިދޭސީންގެ ބަޔޯމެޓްރިކްސް މައުލޫމާތު ނެގުމާއި، ހުއްދަ އޮތް ވިސާއެއްގައި ހުރެ ގަވާއިދާ ޚިލާފަށް މަސައްކަތްކުރާ މީހުން ހޯދައި ޑިޕޯޓްކުރުމުގެ އިތުރުން، އެއްވެސް ސައްޚަ ލިޔެކިޔުމެއް ނެތް މީހުން ހޯދައި ރާއްޖެއިން ބޭރުކުރުމެވެ.