ދިވެހިރާއްޖޭގެ ފޮރިން މިނިސްޓަރު އިރުތިޝާމް އާދަމްގެ ދަޢުވަތަކަށް، ރިޕަބްލިކް އޮފް ސީޝެލްސްގެ މިނިސްޓަރ އޮފް ފޮރިން އެފެއާޒް އެންޑް ޑަޔަސްޕޯރާ، ބެރީ ފޯރ މިއަދު ރާއްޖެ ވަޑައިގެންފިއެވެ.

ވެލާނާ އިންޓަރނޭޝަނަލް އެއަރޕޯޓުން މިނިސްޓަރު ފޯރއަށް މަރުޙަބާ ދެންނެވީ ފޮރިން ސެކްރެޓަރީ ފާތިމަތު އިނާޔާ އާއި ފޮރިން މިނިސްޓްރީގެ އިސް ވެރިންނެވެ.

Ad by Hajj Corporation

މިއީ ސީޝެލްސްގެ ފޮރިން މިނިސްޓަރަކު ރާއްޖެއަށް ކުރައްވާ ފުރަތަމަ ރަސްމީ ދަތުރުފުޅަށް ވުމާއެކު، މިއީ ރާއްޖެއާއި ސީޝެލްސްގެ ގުޅުމުގައި ފާހަގަކޮށްލެވޭ ތާރީޚީ ދަތުރުފުޅެކެވެ.

މި ދަތުރުފުޅުގައި ފޮރިން މިނިސްޓަރު ފޯރ، ފޮރިން މިނިސްޓަރު އިރުތިޝާމް އާދަމްއާ ބައްދަލުކުރައްވައި، ދެ ޤައުމުގެ ދެމެދުގައި އޮތް ގުޅުން އިތުރަށް ބަދަހިކުރުމާ ގުޅޭގޮތުންނާއި، ބައިނަލްއަޤްވާމީ މައިދާނުގައި ދެ ޤައުމުން އިސްކަންދޭ މުހިންމު ކަންކަމުގައި ގުޅިގެން މަސައްކަތް ކުރުމާ ގުޅޭގޮތުން މަޝްވަރާ ކުރެއްވުމަށް ވަނީ ހަމަޖެހިފައެވެ.

ފޮރިން މިނިސްޓްރީން ބުނިގޮތުގައި މި ދަތުރުފުޅުން ރަމްޒުކޮށްދެނީ ރާއްޖެއާއި ސީޝެލްސްއާ ދެމެދު އޮތް ގާތް ރަހުމަތްތެރި ގުޅުމެވެ. އަދި ޚާއްޞަކޮށް ތަރައްޤީވަމުން އަންނަ ކުދި ޖަޒީރާ ޤައުމުތަކުގެ (SIDS) ހައިސިއްޔަތުން، ދެ ޤައުމުގެ ދެމެދުގައި އޮތް އެއްބާރުލުން އިތުރަށް ވަރުގަދަކުރުމަށް ދެ ޤައުމުން ކުރާ މަސައްކަތް މި ދަތުރުފުޅުގެ ސަބަބުން އިތުރަށް ހާމަވެގެންދާ ކަމަށް ވަނީ ބުނެފައެވެ.