ޖުޑީޝަލް ސަރވިސް ކޮމިޝަން (ޖޭއެސްސީ)ގެ ނައިބު ރައީސްގެ މަޤާމު ފުރުއްވަމުން ގެންދެވި އަލްއުސްތާޛު ޔަޒްމީދު މުޙައްމަދު އެ މަޤާމުން އިސްތިއުފާ ދެއްވައިފިއެވެ.

ޔަޒްމީދު މުޙައްމަދަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ފަރާތްޕުޅުން ޖޭއެސްސީއަށް އައްޔަންކުރައްވާފައިވާ މެންބަރެވެ. އޭނާ މި މަޤާމަށް އައްޔަންކުރެއްވީ 23 ފެބުރުއަރީ 2025 ގައެވެ. އެއް އަހަރަށްވުރެ ދިގު މުއްދަތެއްގައި ކޮމިޝަނަށް ޚިދުމަތް ކުރެއްވުމަށްފަހު، މަޤާމުން ވަކިވެވަޑައިގެންފައިވަނީ 17 މެއި 2026 ގައެވެ.

Ad by Hajj Corporation

ޔަޒްމީދު އިސްތިއުފާ ދެއްވުމާ ގުޅިގެން ޖޭއެސްސީން ވަނީ، ކޮމިޝަނުގެ ނައިބު ރައީސްގެ ހައިސިއްޔަތުންނާއި މެންބަރެއްގެ ގޮތުން އޭނާ ކޮށްދެއްވި އިޚްލާޞްތެރި ޚިދުމަތްތަކަށް ޓަކައި ޝުކުރު އަދާކުރައްވާފައެވެ. ނަމަވެސް، މަޤާމުން އިސްތިއުފާ ދެއްވި ސަބަބެއް އެ ކޮމިޝަނުން ހާމަކޮށްފައެއް ނުވެއެވެ.

ޤާނޫނުއަސާސީގައި ބަޔާންކުރާ ގޮތުގެ މަތީން 10 މެންބަރުންގެ މައްޗަށް އެކުލެވޭ ޖޭއެސްސީގައި، ޔަޒްމީދު އިސްތިއުފާ ދެއްވުމާ ގުޅިގެން މިވަގުތު ތިއްބެވީ 9 މެންބަރުންނެވެ. އެހެންކަމުން، ރައީސުލްޖުމްހޫރިއްޔާ އައްޔަންކުރައްވާ މެންބަރުގެ ގޮނޑި މިހާރު ވަނީ ހުސްވެފައެވެ.