ޅ. ނައިފަރުގެ ބިން ހިއްކުމާއި ގޮނޑުދޮށް ހިމާޔަތްކުރުމަށް ސަރުކާރުން ކުރިއަށްގެންދާ ބިޔަ މަޝްރޫޢުގެ ބޮޑުބައެއް ނިމިފައިވާ ކަމަށް އެމްޓީސީސީ އިން ބުނެފިއެވެ.

މި މަޝްރޫޢުގެ މަސައްކަތް ކުރިއަށްދާ ގޮތާ ގުޅޭގޮތުން އެމްޓީސީސީން ހާމަކޮށްފައިވާ މަޢުލޫމާތަށް ބަލާއިރު، މަޝްރޫޢުގެ ފަރުމާކުރުމާއި ބިނާކުރުމުގެ މަސައްކަތުގެ 79 އިންސައްތަ މިހާރު ވަނީ ނިމިފައެވެ.

Ad by Hajj Corporation

މިއީ ނައިފަރަށް ކުރިމަތިވެފައިވާ ބިމުގެ ދަތިކަމަށް ދާއިމީ ޙައްލެއް ހޯދައިދިނުމަށާއި، ރަށުގެ ގޮނޑުދޮށް ގިރުމުގެ މައްސަލައަށް ނިމުމެއް ގެނައުމަށް ޓަކައި ސަރުކާރުން އިސްކަންދީގެން ކުރިއަށްގެންދާ މުހިންމު މަސައްކަތެކެވެ. ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ރަށްރަށުގެ ތަރައްޤީއަށް ކަނޑައަޅާފައިވާ ސިޔާސަތުތަކުގެ ދަށުން، މި މަޝްރޫޢުގެ މަސައްކަތްތައް ހަލުވި ދުވެއްޔެއްގައި ކުރިއަށްދާކަން ވަނީ ފާހަގަކޮށްފައެވެ.

މި މަޝްރޫޢުގެ ދަށުން ހިމެނޭ މައިގަނޑު މަސައްކަތްތަކުގެ ތެރޭގައި، 209,500 އަކަމީޓަރުގެ ބިން ހިއްކުމާއި، ހިއްކާ ސަރަޙައްދާއި ރަށުގެ ގޮނޑުދޮށް ހިމާޔަތްކުރުމަށްޓަކައި 2,139 މީޓަރުގެ ސަރަޙައްދެއްގައި ބޮޑުހިލައިގެ ރިވެޓްމަންޓް ޖެހުން ހިމެނެއެވެ.

މި މަޝްރޫޢު ނިމުމާއެކު، ނައިފަރުގެ ރައްޔިތުންނަށް ދިމާވެފައިވާ ބޯހިޔާވަހިކަމުގެ ދަތިތަކަށް ބޮޑު ލުޔެއް ލިބިގެންދާނެއެވެ. އަދި މީގެ ސަބަބުން ރަށުގެ އިޤްތިޞާދީ އަދި އިޖުތިމާޢީ ތަރައްޤީއަށް އާ ދޮރުތަކެއް ހުޅުވި، ރަށުގެ މުސްތަޤުބަލަށް ބޮޑެތި ކުރިއެރުންތަކެއް ލިބޭނެ ކަމަށް ސަރުކާރުން އުންމީދު ކުރެވެއެވެ.

މަޝްރޫޢުގެ ބާކީ ހުރި މަސައްކަތްތައް ތާވަލާ އެއްގޮތަށް ނިންމުމަށްޓަކައި ކަމާގުޅުންހުރި އިދާރާތަކުން ދަނީ މަސައްކަތް ކުރަމުންނެވެ.