ރައީސުލްޖުމްހޫރިއްޔާ ޑރ. މުހައްމަދު މުއިއްޒު، ޖުޑީޝަލް ސާވިސް ކޮމިޝަން (ޖޭއެސްސީ)ގެ މެންބަރުކަމަށް، ދަފްތަރު ނަންބަރު ރސ 535، އަލީ ނަސީރު ގާސިމް މިއަދު އައްޔަން ކުރައްވައިފިއެވެ.

ރައީސް އައްޔަންކުރައްވާ މެންބަރެއްގެ ހައިސިއްޔަތުން، ޖޭއެސްސީށް މެންބަރުކަމަށް ނަސީރު ގާސިމް، ޖޭއެސްސީގެ ގާނޫނުގެ 3 ވަނަ މާއްދާގެ 8 ވަނަ ނަންބަރުގައި ބަޔާންކޮށްފައިވާ ގޮތުގެމަތީން ކަމަށް ރައިސް އޮފީހުން ވަނީ ބުނެފައެވެ.

Ad by Hajj Corporation

މީގެ ކުރިން ޖޭއެސްސީގައި ރައީސް އައްޔަން ކުރައްވާ މެންބަރެއްގެ ގޮތުގައި އިންނެވީ ޔަޒްމީދު މުހައްމަދެވެ. ޔަޒްމީދު ވަނީ އެ މަގާމުން އިސްތިއުފާ ދެއްވައިފައެވެ.

މިއަދު ހެނދުނު، ރައީސްގެ އޮފީހުގައި ބޭއްވެވި ރަސްމިއްޔާތެއްގައި ނަސީރު ވަނީ ޖޭއެސްސީގެ މެންބަރުކަމުގެ ހުވާ ކުރައްވައި، ހުވާގެ އިގްރާރުގައި ސޮއިކުރައްވާފައެވެ. ނަސީރަށް މެންބަރުކަމުގެ ހުވާލައިދެއްވީ، ސުޕްރީމް ކޯޓުގެ ފަނޑިޔާރު އަލީ ރަޝީދު ހުސައިނެވެ.

މި ރަސްމިއްޔާތުގައި ރައީސް ވަނީ، ޖޭއެސްސީ މެންބަރުކަމަށް އައްޔަންކުރެއްވިކަމުގެ ލިޔުން ނަސީރު ގާސިމާއި ހަވާލުކޮށްދެއްވާފައެވެ.