އިންޑިއާގެ މަޝްހޫރު ވިޔަފާރިވެރިޔާ އާނަންދު އަހޫޖާ އާއި އޭނާގެ އަންހެނުން، ބޮލީވުޑްގެ މަޝްހޫރު ބަތަލާ ސޯނަމް ކަޕޫރު، ލަންޑަންގެ ނޮޓިންގް ހިލްގައި ހުންނަ އެމީހުންގެ 21 މިލިއަން ޕައުންޑްގެ ގަނޑުވަރެއް ފަދަ ގޭގެ މަސައްކަތު މީހުން ބޭތިއްބުމަށްޓަކައި އެ ސަރަހައްދުން ފަސް ފްލެޓް ގަނެފި ކަމަށް ރިޕޯޓްތައް ބުނެފިއެވެ.

މީގެ ތިން އަހަރު ކުރިން 200 އަހަރުވީ މި ބޮޑު އިމާރާތް ގަތުމަށްފަހު، އުމުރުން 42 އަހަރުގެ އާނަންދު އަހޫޖާ އާއި ސޯނަމް ކަޕޫރު ވަނީ އެތަނުގެ އެތެރެ އެއްކޮށް ބަދަލުކޮށް، ބޭސްމަންޓްގައި ފަތާ ފެންގަނޑަކާއި ބާސްކެޓް ކޯޓެއް ހެދުމަށް ރާވާފައެވެ. ނަމަވެސް މި މަޝްރޫޢާ ގުޅިގެން އަވަށްޓެރިންގެ ފަރާތުން ވަނީ ގިނަ އިއުތިރާޒްތަކެއް ކުރިމަތިވެފައެވެ.

Ad by Hajj Corporation

މި މައްސަލައިގައި ތިން އަހަރު ދުވަހުގެ ޕްލޭނިންގް ކޯޅުމަކަށްފަހު، އެ ދެމަފިރިންނަށް މިހާރު ވަނީ އިމާރާތް ކުރުމުގެ ހުއްދަ ލިބިފައެވެ. ނަމަވެސް، އަވަށްޓެރިން ތުހުމަތު ކުރާ ގޮތުގައި އެ ދެމަފިރިން ވަނީ ގާތްގަނޑަކަށް 4 މިލިއަން ޕައުންޑް ހޭދަކޮށް، އެ ސަރަހައްދުގެ 'ހިލްކްރެސްޓް' ބްލޮކުން ފަސް ފްލެޓް ގަނެފައެވެ.

އަވަށްޓެރިން ބުނާ ގޮތުގައި މި ފްލެޓްތައް ބޭނުންކުރާނީ އެމީހުންގެ ގޭގައި މަސައްކަތްކުރާ މުވައްޒަފުން ބޭތިއްބުމަށެވެ. އަދި މިކަމާ މެދު އަވަށްޓެރިން ޝަކުވާކޮށްފި ނަމަ، އެ ފްލެޓްތައް 'ސޯޝަލް ހައުސިންގް' ނުވަތަ އާންމު ފަގީރުންނަށް ދޫކުރާ ބޯހިޔާވަހިކަމަށް ބަދަލުކުރާނެ ކަމުގެ އިންޒާރު ވެސް އެ ދެމަފިރިން ދީފައިވާ ކަމަށް ރިޕޯޓްތައް ބުނެއެވެ.

މި މައްސަލައަކީ ނޮޓިންގް ހިލް ފަދަ މުއްސަނދިން ދިރިއުޅޭ ސަރަހައްދެއްގައި ބޮޑު ބަހުސަކަށް ވެފައިވާ ކަމެކެވެ. ސޯނަމް ކަޕޫރަކީ އިންސްޓަގްރާމްގައި 33 މިލިއަނަށް ވުރެ ގިނަ ފޮލޯވަރުން ތިބި ނުފޫޒުގަދަ ތަރިއަކަށް ވާއިރު، މި ހާދިސާއާ ގުޅިގެން ގިނަ ބައެއްގެ ސަމާލުކަން ވަނީ މިކަމަށް ހުއްޓިފައެވެ.