މާލެއިން ފުރައިގެން އއ. ތޮއްޑޫއަށް ދަތުރުކުރަމުން ދިޔަ ލޯންޗެއް ދިޔަވެ އަޑިއަށް ދަނިކޮށް، އެ އުޅަނދުން ދަތުރުކުރި 25 މީހަކު ދިވެހި ފުލުހުންގެ ޚިދުމަތުން މިއަދު ސަލާމަތްކޮށްފިއެވެ.

ފުލުހުން ވިދާޅުވި ގޮތުގައި، މި ޙާދިސާ ހިނގާފައިވަނީ ހޯމަ ދުވަހުގެ ހަވީރު 17:30 ހާއިރުއެވެ. "ރިލެކްސް އައިޝާ" ނަމަކަށް ކިޔާ މި ލޯންޗު ދިޔަވެ އަޑިއަށްދާކަމުގެ މަޢުލޫމާތު ލިބުމާއެކު، ފުލުހުން ވަނީ އެ ސަރަޙައްދަށް ގޮސް އެހީތެރިކަން ފޯރުކޮށްދީފައެވެ. މި ޙާދިސާ ހިނގިއިރު ލޯންޗުގައި ތިބި 25 މީހުން ވެސް ވަނީ ރައްކާތެރިކަމާއެކު ފުލުހުންގެ އުޅަނދަށް ނަގައި، މާލެ ގެނެސްފައެވެ.

Ad by Hajj Corporation

މި ދުވަސްވަރަކީ މުޅި ރާއްޖެއަށްވެސް މޫސުން ގޯސް ދުވަސްވަރަކަށް ވުމާއެކު، ކަނޑުދަތުރުކުރާ ފަރާތްތަކުން މޫސުމަށް ޚާއްޞަ ސަމާލުކަމެއް ދިނުމަށް ކަމާބެހޭ ފަރާތްތަކުން ވަނީ އިލްތިމާސްކުރައްވާފައެވެ.

މޫސުމާ ބެހޭ ޤައުމީ އިދާރާ (މެޓް) އިން ލަފާކޮށްފައިވާ ގޮތުގައި ކުރިއަށް އޮތް ފަސް ދުވަހުވެސް މުޅި ރާއްޖެއަށް ވިއްސާރަކުރާނެއެވެ. ވަކިން ޚާއްޞަކޮށް އުތުރާއި މެދުރާއްޖެތެރޭގެ އަތޮޅުތަކަށް މޫސުން އިތުރަށް ގޯސްވާނެ ކަމަށް އެ އިދާރާއިން ބުންޏެވެ.