ޕީޕަލްސް ނޭޝަނަލް ކޮންގްރެސް (ޕީއެންސީ) ގެ ޕާލަމެންޓް ގްރޫޕްގެ މެންބަރުންނަށް ފައިސާ ބަހާފައިވާ ކަމަށް ބުނެ ''އަދަދު'' ނޫހުން ފަތުރަމުންދާ ޚަބަރުތަކަކީ ދޮގު ޚަބަރެއް ކަމަށް ބާރަށު ދާއިރާގެ މެންބަރު އިބްރާހިމް ޝުޖާއު ވިދާޅުވެއްޖެއެވެ.

ޝުޖާއު މިފަދައިން ވިދާޅުވީ ސޯޝަލް މީޑިއާ ޕްލެޓްފޯމް 'އެކްސް' ގައި ކުރެއްވި ޕޯސްޓެއްގައެވެ.

Ad by Hajj Corporation

އޭނާ ވިދާޅުވީ 'އަދަދު' ނޫހުން މިކަމާ ގުޅޭގޮތުން ގެނެސްދީފައިވާ ޚަބަރަކީ އެއްވެސް އަސާސެއް ނެތް ދޮގު މަޢުލޫމާތެއް ކަމަށެވެ.

ޝުޖާއު އިތުރަށް ތަފްސީލް ކޮށްދެއްވަމުން ވިދާޅުވީ، ޕީއެންސީގެ ޕާލަމެންޓް ގްރޫޕްގެ މެންބަރުންނަށް ލިބެނީ އެމްޑީޕީ އާއި އެހެނިހެން މެންބަރުންނަށް ވެސް ލިބޭ އުސޫލުން މަޖިލީހުން ކަނޑައަޅާފައިވާ މުސާރަ އެކަނި ކަމަށެވެ. އަދި ޕީއެންސީގެ މެންބަރުންނާ ގުޅޭގޮތުން މިފަދަ ދޮގު ވާހަކަތައް ފެތުރުން ހަރުކަށި އިބާރާތުން ކުށްވެރިކުރާ ކަމަށްވެސް އޭނާ ވިދާޅުވިއެވެ.

"ދޮގު ޚަބަރު ފަތުރައި، ފިތުނަ އުފައްދައިގެން މިގްރޫޕް ރޫޅާލެވޭނެ ކަމަށް ދެކުމީ މޮޔަކަމެއް ކަމުގައި ދަންނަވަން،" ޝުޖާއު ވިދާޅުވިއެވެ.

ޝުޖާއު ވިދާޅުވީ ޕީއެންސީގެ ސުޕަރ މެޖޯރިޓީ އޮތް 20 ވަނަ ރައްޔިތުންގެ މަޖިލީހުން އަބަދުވެސް މަސައްކަތް ކުރާނީ ޤައުމާއި ރައްޔިތުންގެ ލާބަޔާއި މަންފާއަށްޓަކައި ކުރަންޖެހޭ މުހިއްމު މަސައްކަތްތައް ކުރުމުގައި ކަމަށެވެ.