މާލެ ސަރަހައްދުގެ ދަތުރުފަތުރުގެ ދަތިތަކަށް ހައްލެއް ހޯދައިދިނުމަށް ރައީސުލްޖުމްހޫރިއްޔާގެ އިސްނެންގެވުމުގެ މަތިން މިދިޔަ އޭޕްރީލް މަހު އިފްތިތާޙުކުރި "މާލެ ޓެކްސީ ލައިން" (އެމް.ޓީ.އެލް) ގެ މޮބައިލް އެޕްލިކޭޝަން، މިހާރު އެޕަލް އެޕް ސްޓޯރުން އައިފޯން ބޭނުންކުރާ ފަރާތްތަކަށް ލިބެން ފަށައިފިއެވެ.

%100 ތިމާވެއްޓާ ރައްޓެހި އިލެކްޓްރިކް އުޅަނދުތައް ބޭނުންކޮށްގެން ދޭ މި ހިދުމަތަކީ ރައްކާތެރި އަދި އިތުބާރު ހުރި ހިދުމަތަކަށްވާއިރު، އަލަށް ތައާރަފުކުރި މި އެޕްލިކޭޝަން ނުވަތަ ކިއުއާރު ކޯޑެއް މެދުވެރިކޮށް މާލެ، ހުޅުމާލެ އަދި ވިލިމާލެ ހިމެނޭހެން މަދު ސިކުންތުކޮޅެއްގެ ތެރޭގައި ޓެކްސީ ބުކް ކުރެވޭނެ ކަމަށް އެމް.ޓީ.ސީ.ސީ އިން މައުލޫމާތުދެއެވެ.

Ad by Hajj Corporation

ތިން ސައިޒެއްގެ 150 އުޅަނދާއެކު ފެށި މި ހިދުމަތުގައި ފުރަތަމަ މަހު އެކަނިވެސް 13،000 އަށްވުރެ ގިނަ ދަތުރު ކޮށްފައިވާއިރު، އެންޑްރޮއިޑް ފޯނު ބޭނުންކުރާ ފަރާތްތަކަށް ހާއްސަ އެޕްލިކޭޝަން ވެސް ވަރަށް އަވަހަށް ގޫގުލް ޕްލޭ ސްޓޯރަށް ނެރޭނެއެވެ.

އަދި އެ އެޕްލިކޭޝަން ނެރުމާ ހަމައަށް އެންޑްރޮއިޑް ބޭނުންކުރާ ފަރާތްތަކުން އެމް.ޓީ.އެލް ގެ ވެބް އެޕްލިކޭޝަން ނުވަތަ ހޮޓްލައިން ނަންބަރު 1655 އަށް ގުޅައިގެން ހިދުމަތަށް އެދެވޭނެ އިންތިޒާމު ވަނީ ހަމަޖެހިފައެވެ. މި އައު އެޕްލިކޭޝަނަކީ ރައްޔިތުންނަށް އެންމެ ޒަމާނީ ވަސީލަތްތަކާއެކު ލުއިފަސޭހަ ހިދުމަތެއް ފޯރުކޮށްދިނުމަށް އެޅުނު މުހިންމު ފިޔަވަޅެކެވެ.