ޕީޕަލްސް ނޭޝަނަލް ކޮންގްރެސް (ޕީއެންސީ) ގެ މުޅި ޕާޓީ މިހާރު ތައްޔާރުވަމުން އަންނަނީ އެ ޕާޓީގެ ބޮޑު ކޮންގްރެސްއަށް ކަމަށާއި، ކުރިއަށް އޮތް ތަނުގައި ޕާޓީގެ މެމްބަރުންގެ މަޖިލީހުގެ ބައްދަލުވުންތައް ވަރަށް ގާތްގާތުގައި ބާއްވަމުން ގެންދާނެ ކަމަށް އެ ޕާޓީގެ އިސް ބޭފުޅެއް ކަމަށްވާ، ރައްޔިތުންގެ މަޖިލީހުގެ ބާރަށު ދާއިރާގެ މެމްބަރު އިބްރާހިމް ޝުޖާއު ވިދާޅުވެއްޖެއެވެ.

ޝުޖާއު މިހެން ވިދާޅުވީ ރޭ ބޭއްވުނު ޕީއެންސީގެ މެމްބަރުންގެ މަޖިލީހުގެ ބައްދަލުވުމަށްފަހު އެކްސްގައި ކުރެއްވި ޕޯސްޓެއްގައެވެ. އޭނާ ވިދާޅުވި ގޮތުގައި، ރޭ ބޭއްވި މި ބައްދަލުވުމުގައި ޕާޓީގެ ރައީސް، ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވަނީ މުހިންމު ހުށަހެޅުމެއް ހުށަހަޅުއްވާފައެވެ.

Ad by Hajj Corporation

ރައީސް މުއިއްޒު ހުށަހެޅުއްވި މި ހުށަހެޅުން، މެމްބަރުންގެ މަޖިލީހުގެ ބައްދަލުވުމުގައި ބައިވެރިވި ހުރިހާ މެމްބަރުންގެ އިއްތިފާގުން ވަނީ ފާސްކޮށްފައެވެ. ނަމަވެސް، ރައީސް ހުށަހެޅުއްވި އެ ހުށަހެޅުމަކީ ސީދާ ކޮން ކަމަކާ ގުޅޭ ހުށަހެޅުމެއް ކަމެއް ޝުޖާއު ހާމަކުރައްވާފައެއް ނުވެއެވެ.

މައުލޫމާތު ލިބިފައިވާގޮތުގައި ރައީސް ހުށަހެޅުއްވީ ޕާޓީގެ ކޮންގްރެސް އަވަސްކުރުމަށެވެ. ނަމަވެސް ޕީއެންސީން މިކަން އަދި ހާމަކޮށްފައެއްނުވެއެވެ.

ޕާޓީގެ ހަރަކާތްތައް ވަރުގަދަ ކުރުމަށްޓަކައި ކުރަމުންދާ މަސައްކަތްތަކަށް އަލިއަޅުއްވާލައްވަމުން ޝުޖާއު ވިދާޅުވީ، "މުޅި ޕާޓީ މިދަނީ ޕާޓީގެ މަތީ މަޖިލިހަށް (ކޮންގްރެސްއަށް) ވަރަށް ފުރިހަމައަށް ތައްޔާރުވަމުން" ކަމަށެވެ. އަދި ޕާޓީގެ ނިންމުންތައް ނިންމުމުގައި މެމްބަރުންގެ މަޖިލީހުގެ ދައުރު ފުޅާކޮށް، ކުރިއަށް އޮތް ދުވަސްތަކުގައި އެ މަޖިލީހުގެ ބައްދަލުވުންތައް ކައިރިކައިރީގައި ބާއްވާނެ ކަމުގެ ޔަގީންކަން ވެސް އޭނާ ވަނީ ދެއްވާފައެވެ.