މިއަހަރުގެ ހައްޖުގެ މުގައްދަސް އަޅުކަން އަދާކުރުމަށްފަހު، ދިވެހި ހައްޖުވެރިންގެ ފުރަތަމަ ގުރޫޕު މިއަދު ރާއްޖެ އަތުވެއްޖެއެވެ.

މިއަދު ވެލާނާ އިންޓަރނޭޝަނަލް އެއަރޕޯޓުގައި ޖެއްސި ސައުދިއާ އެއަރލައިންގެ ފްލައިޓުން ޖުމްލަ 241 ހައްޖުވެރިން ވަނީ ރާއްޖެ އައިސްފައެވެ. އަދި މިރޭ އެއަރޕޯޓުން ހައްޖުވެރިންނަށް މަރުހަބާ ދެންނެވުމަށް ހައްޖުވެރިންގެ އާއިލާތަކުން ވަނީ ޖަމާވެފައެވެ.

Ad by Hajj Corporation

ދިވެހި ހައްޖު މިޝަނުން ހާމަކޮށްފައިވާ ތާވަލަށް ބަލާއިރު، ހައްޖުވެރިންގެ ދެވަނަ ފްލައިޓު ރާއްޖެ އައުމަށް ހަމަޖެހިފައިވަނީ މިމަހުގެ 7 ވަނަ ދުވަހުގެ ހަވީރު 17:40 ގައެވެ. އަދި ތިންވަނަ ފްލައިޓު މިމަހުގެ 8 ވަނަ ދުވަހުގެ މެންދުރުފަހު 14:00 ގައި އައުމަށް ހަމަޖެހިފައިވާއިރު، ހައްޖުވެރިންގެ އެންމެ ފަހު ގުރޫޕު ރާއްޖެ އަންނާނީ މިމަހުގެ 9 ވަނަ ދުވަހުގެ ދަންވަރު 12:00 އެހައިކަންހާއިރު ކަމަށް އެ މިޝަނުން މައުލޫމާތުދެއެވެ.

ހައްޖުވެރިން ރާއްޖެ ގެނައުމުގެ އިންތިޒާމުތައް ހަމަޖައްސާފައިވަނީ ސައުދިއާ އެއަރލައިންގެ އިތުރުން ރާއްޖޭގެ ގައުމީ އެއަރލައިން "މޯލްޑިވިއަން" މެދުވެރިކޮށެވެ.

މިއަހަރު ރާއްޖެއިން ޖުމްލަ 1،019 މީހުން ހައްޖުގެ މަތިވެރި އަޅުކަން އަދާކުރުމަށް ސައުދީ އަރަބިއްޔާއަށް ދިޔައެވެ. މީގެ ތެރޭގައި ސަރުކާރުގެ އެހީގައި ހައްޖަށް ފޮނުވި މީހުންވެސް ހިމެނެއެވެ. ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރުން ވަނީ ހައްޖުވެރިންގެ ކަންކަން ވީހާވެސް ފަސޭހަ މަގަކުން އިންތިޒާމު ކުރުމަށް ހާއްސަ އިސްކަމެއް ދީފައެވެ.