ނިއުރޭޑިއަންޓް ސްޕޯރޓްސް ކުލަބުގެ 19 އަހަރުން ދަށުގެ ފުޓްބޯޅަ ޓީމު އެކުލަވާލުމުގެ މަސައްކަތް އެ ކުލަބުން ރަސްމީކޮށް ފަށައިފިއެވެ. މިގޮތުން ކުރިއަށް އޮތް ޔޫތު ޗެމްޕިއަންޝިޕްގައި ވާދަކުރާ ޓީމަށް ކުޅުންތެރިން ހޮވުމަށް ބާއްވާ ޓްރަޔަލްތަކުގައި ބައިވެރިވުމުގެ ފުރުސަތު މިހާރު ވަނީ އާންމުކޮށް ހުޅުވާލާފައެވެ.

މި ޓްރަޔަލްތަކަކީ ޖޫން މަހުގެ 20 ވަނަ ދުވަހު ފެށުމަށް ތާވަލުކޮށްފައިވާ އެފްއޭއެމް ޔޫތު ޗެމްޕިއަންޝިޕް ފުޓްބޯޅަ މުބާރާތަށް ވަރުގަދަ ޓީމެއް އެކުލަވާލުމުގެ މަގުސަދުގައި ބާއްވާ ހަރަކާތެކެވެ. ނިއުރޭޑިއަންޓުން ބޭނުންވަނީ ހުނަރުހުރި ޒުވާން ކުޅުންތެރިންނަށް ފުރުސަތު ދީ، އެ ކުޅުންތެރިންގެ ހުނަރު ދައްކާލުމުގެ މަގު ތަނަވަސްކޮށްދިނުމަށެވެ.

Ad by Hajj Corporation

ކުލަބުން ހާމަކޮށްފައިވާ ގޮތުގައި، ޓީމު އެކުލަވާލުމަށް ބާއްވާ ޓްރަޔަލްތައް ފެށުމަށް ހަމަޖެހިފައިވަނީ 7 ޖޫން 2026 ވާ އާދިއްތަ ދުވަހުގެ ހަވީރު 15:45 ގައެވެ. މި ޓްރަޔަލްތައް ކުރިއަށްދާނީ އެފްއޭއެމް ޓާފް 2 ގައެވެ.

މި ޓްރަޔަލްގައި ބައިވެރިވެވޭނީ ވަކި އުމުރުފުރާ ތަކަކަށް އަމާޒުކޮށްގެންނެވެ. އެގޮތުން 2007، 2008 އަދި 2009 ވަނަ އަހަރު އުފަންވެފައިވާ ކޮންމެ ކުއްޖަކަށްވެސް މި ފުރުސަތުގައި ބައިވެރިވުމުގެ ފުރުސަތު އޮންނާނެއެވެ. ނިއުރޭޑިއަންޓުން ވަނީ ފުޓްބޯޅައަށް ޝައުގުވެރިކަން ހުރި މި އުމުރުފުރާގެ ޒުވާނުންނަށް ޓްރަޔަލްގައި ބައިވެރިވުމަށް ދައުވަތު އަރުވާފައެވެ.

ރާއްޖޭގެ އެންމެ ކާމިޔާބު އެއް ކުލަބު ކަމަށްވާ ނިއުރޭޑިއަންޓުން ޒުވާން ޓީމެއް އެކުލަވާލުމުގެ މަސައްކަތް ފަށާފައި މިވަނީ، ގިނަ ދުވަސްތަކަކަށްފަހު އެ ކުލަބުގެ ހަރަކާތްތައް ވަރުގަދަކޮށް، ފުޓްބޯޅައިގެ ތެރެއަށް އަލުން ވަނުމަށް ކުރަމުންދާ މަސައްކަތުގެ ތެރެއިންނެވެ.