ފުޓްބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އިން އިންތިޒާމުކުރާ ޔޫތު ޗެންޕިއަންޝިޕްގައި ބައިވެރިވާ ނިއުރޭޑިއަންޓް ސްޕޯޓްސް ކްލަބުގެ ޓީމަށް، ރާއްޖޭގެ އެންމެ އުއްމީދީ އެއް ފުޓްބޯޅަ ކުޅުންތެރިޔާ އީތަން އިބްރާހިމް ޒަކީ ސޮއިކޮށްފިއެވެ. މި މުބާރާތުގައި ނިއުރޭޑިއަންޓްގެ ޒުވާން ޓީމު މައިދާނަށް ނުކުންނައިރު، ޓީމުގެ ކެޕްޓަންކަން ކުރާނީވެސް އީތަންއެވެ. މުބާރާތުގެ ފުރަތަމަ މެޗުގައި ނިއު މިމަހުގެ 28 ވަނަ ދުވަހުގެ ރޭގައނޑު ނިކުންނާނީ އޮށި ސްޕޯރޓްސް ކުލަބާއި ދެކޮޅަށެވެ.

Ad by Hajj Corporation

އީތަން އަކީ ރާއްޖޭގައި އުފެދުނު އެންމެ ހުނަރުވެރި ޒުވާން ތަރިންގެ ތެރެއިން ފާހަގަކޮށްލެވޭ ކުޅުންތެރިއެކެވެ. އޭނާ ވަނީ އުމުރުން އެންމެ 14 އަހަރާއި 9 މަހުގައި ދިވެހި ޕްރިމިއަރ ލީގުގެ މެޗެއްގައި ލަނޑު ޖަހައި، ލީގު ތާރީހުގައި ލަނޑު ޖެހި އެންމެ ހަގު ކުޅުންތެރިޔާގެ ރެކޯޑް ގާއިމުކޮށްފައެވެ. އެ ތާރީޚީ ލަނޑު އޭނާ ކާމިޔާބުކުރީ ކްލަބް ވެލެންސިއާގެ ސީނިއަރ ޓީމަށް ކުޅެމުންނެވެ.

ބައިނަލްއަގުވާމީ މައިދާނުގައިވެސް އީތަން ވަނީ ފާހަގަކޮށްލެވޭ ތަޖުރިބާތަކެއް ހޯދާފައެވެ. އެގޮތުން ސްޕެއިންގެ ދެވަނަ ޑިވިޝަންގެ ކްލަބެއް ކަމަށްވާ އީއެފް ހުއެސްކާގެ 16 އަހަރުން ދަށުގެ ޓީމަށް އެއް އަހަރު ދުވަހުގެ އެއްބަސްވުމެއްގެ ދަށުން އޭނާ ވަނީ ކުޅެފައެވެ. މީގެ އިތުރުން، އުމުރުން އެންމެ 17 އަހަރުގައި އީތަން ވަނީ ރާއްޖޭގެ ސީނިއަރ ޤައުމީ ޓީމުގެ ސްކޮޑުގައި ވެސް ހިމެނިފައެވެ.

މައިގަނޑު ގޮތެއްގައި ފޯވަޑް އަދި ވިންގަރަކަށް ކުޅޭ އީތަންއަކީ ބޯޅަ ގެންގުޅުމާއި ގޯލަށް ނުރައްކާކުރުމުގައި ފާހަގަކޮށްލެވޭ ފަދަ ހުނަރުވެރި ކުޅުމެއް ދައްކަމުން އަންނަ ކުޅުންތެރިއެކެވެ.

ގިނަ ދުވަސްތަކަކަށްފަހު އައު މެނޭޖްމަންޓަކާއެކު މީގެ އެއް އަހަރު ކުރީން ފުރަތަމަ ޑިވިޝަނަށް ނިކުމެ، މިދިޔަ ސީޒަނުގައި ނިއުރޭޑިއަންޓުން ވަނީ ކުލަބުގެ ތާރީޚުގައި 13 ވަނަ ފަހަރަށް އެފްއޭ ކަޕް ކާމިޔާބުކޮށްފައެވެ. މިއާއެކު އެ ކްލަބުން ވަނީ ޖުމްލަ 50 ތަށި ހަމަކޮށްފައެވެ. ނިއުރޭޑިއަންޓަކީ މިވަގުތު ރާއްޖޭގައި އެންމެ ގިނަ ސަޕޯޓަރުން ތިބި ކްލަބުކަން ފާހަގަކޮށްލެވެއެވެ.