ޓީޖީއެސްޓީ ބޮޑު ކުރުމަކުން ރައްޔިތު މީހާއަކަށް އޭގެ އަސަރެއް ނުކުރާނެ ކަމަށާއި، އޭގެ ބަދަލުގައި ލިބޭ އާމްދަނީން އޭގެ ފައިދާ ކުރާނެކަމަށް ތިނަދޫ އުތުރު ދާއިރާގެ މެންބަރު ސައުދުﷲ ޙިލްމީ މިއަދު ވިދާޅުވެއްޖެއެވެ.

މުދަލާއި ޚިދުމަތުގެ އަގުން ޓެކްސް ނެގުމުގެ ޤާނޫނަށް ގެންނަ އިސްލާހްގެ ބިލުގެ އިބުތިދާއީ ބަހުސްގައި މިއަދު މަޖިލީހުގައި ވާހަކަދައްކަވަމުން ސައުދުﷲ ވިދާޅުވީ، ޓީޖީއެސްޓީ ބޮޑު ކުރުމަކުން ރައްޔިތު މީހާއަކަށް އޭގެ އަސަރެއް ނުކުރާނެ ކަމަށާއި، އޭގެ ބަދަލުގައި ލިބޭ އާމްދަނީން ރައްޔިތުން މީހާ އަށް އޭގެ ފައިދާ ކުރާނެކަމަށެވެ.

މިފަދަ ބިލެއްގެ ވާހަކަ ދައްކާއިރު، ކުދި އަދި މެދު ފަންތީގެ ވިޔަފާރިތަކުގެ ވާހަކަ ދައްކަންޖެހޭކަމަށް ވިދާޅުވެ ސައުދުﷲ ވިދާޅުވީ އެ ވިޔަފާރިތައް ފުނޑިގެން ދަނީ އެ ވިޔަފާރިތަކުން ކުރި ކަންތައްތަކެއްގެ ސަބަބުންނޫން ކަމަށެވެ. އަދި އެކަން އެހެން ދިމާވެފައި ވަނީ ސަރުކާރުތަކަކުން ކުރި ކަންކުރިގޮތުން ކަމަށް ވިދާޅުވިއެވެ.

''އެމީހުންނަށް ލިބެންޖެހޭ ފައިސާތަކާއި، އެމީހުންގެ އާމްދަނީ ބަންދުވުމުގެ ސަަބަބުން ފުނޑިގެން ދަނީ، އެހެންކަމުން ޤާނޫނުތަކާއި ޤަވާޢިދުތަކަށް އިސްލާހްގެނެސްގެން އެ ވިޔަފާރިތައް ސަލާމަތްކުރަންޖެހޭ، އެ ވިޔަފާރިތަކަކީ އޭގެ ސަބަބުން އާންމު ރައްޔިތުންނަށް ނުހަނު ފައިދާކުރާނެ ވިޔަފާރިތައް'' ސައުދުﷲ ވިދާޅުވިއެވެ.

މީގެ އިތުރުން ދައުލަތުގެ އާމްދަނީން ޚިޔާނަތާއި ވައްކަންކޮށްފައިވާ ފަރާތްތައް ބަލައި އެ ފަރާތްތަކުން ހިޔާނާތްވެފައިވާ ފައިސާ ލަސްނުކޮށް މާލިއްޔަތަށް ވެއްދުމަކީ ވެސް ވަރަށް މުހިންމުކަމެއް ކަމަށް އޭނާ ވަނީ ވިދާޅުވެފައެވެ.