ބޭހުގެ މައްސަލަ ހައްލުކުރަން ނިޒާމީ ބަދަލުތަކެއް ގެންނަންޖެހޭ ކަމަށް ބޭސް ކުންފުނީގެ މެނޭޖިންގ ޑިރެކްޓަރ ޑރ. ޝާހް މާހިރު ވިދާޅުވެއްޖެއެވެ.

ރައްޔިތުންނަށް ބޭސް ލިބުމުގައި ނިޒާމީ ގޮތެއްގައި ހުރި މައްސަލަތައް ހައްލުކުރުމަށް މަސައްކަތް ކުރަމުންދާކަން ހާމަކުރައްވާ ޑރ. ޝާހު ވިދާޅުވީ މުޅި ނިޒާމު ހަރުދަނާ ކުރަން ގިނަ މަސައްކަތްތައް ކުރަން ޖެހޭކަމަށެވެ. އޭގެތެރޭގައި ބޭސް އެތެރެކުރުމުގެ މަރުހަލާގައި ހުރި ގޮންޖެހުންތަކާއި، ވަކި ބޭސްތަކަކީ ވަކި ހާއްސަ ފިނިހޫނުމިނެއްގައި ބަހައްޓައިގެން ގެންނަން ޖެހޭ ބޭހަށްވުމުން ހުރި ދަތިތަކާއި، ބޭރުން ހާއްސަ ބޭސްތައް ހޯދުމަށް ދިމާވާ ގޮންޖެހުންތައް ފާހަގަކުރެއްވިއެވެ.

Ad by Hajj Corporation

މީގެއިތުރުން ބޭހުގެ ކޯޑުތައް އިދާރާތަކުގެ މެދުގައި އެއްހަމަ ކުރުމާއި، އެކި ވައްތަރުގެ އެކި ބްރޭންޑްތަކުގެ ބޭސް ހުރުމުގެ ސަބަބުން ބޭސްތައް ލިއުމުގައި ހުރި ކަންކަންވެސް ހައްލުކުރަންޖެހޭ ކަމަށް ވެސް ވިދާޅުވިއެވެ. އަދި މިކަންކަން ހައްލުކުރަން އެހެން އިދާރާރާތަކާއެކު މަސައްކަތް ކުރަމުންދާ ކަމަށް ވަނީ ވިދާޅުވެފައެވެ.

މިކަން ހައްލުކުރުމަށް އެކުންފުނިން ދުރާލާ ގެނެވޭނެ ބޭސްތައް ގެނެސް، ސްޓޮކް މެއިންޓެއިންކޮށް މުޅި ނިޒާމުގެ ތެރޭގައި ހުރި މައްސަލަތައް ހައްލުކުރުމަށް މަސައްކަތް ކުރަމުންދާ ކަމަށް ޝާހް ވިދާޅުވިއެވެ. އޭނާ ވަނީ އެކުންފުނީގެ މަސައްކަތްތަކުން ނަތީޖާ 6 މަސް ތެރޭ ރައްޔިތުންނަށް ފެނިގެންދާނެ ކަމަށް ވެސް ވިދާޅުވިއެވެ.

ދައުލަތުގެ ބޭސް ކުންފުންޏަކީ ބޭސް ލިބުމުގައި ހުރި ދަތިތައް ހައްލުކުރުމަށް އެކަމަށް ހާއްސަ ކުންފުންޏެއްގެ ދަށުން އެ މަސައްކަތް ކުރުމަށް އުފެއްދި ކުންފުންޏެކެވެ.