ރާއްޖެއަށް ބޭސް އެތެރެކުރުމުގެ މަސައްކަތަށް ހާއްސަ ކުންފުންޏެއް އުފައްދަން ނިންމާފައިވާކަމަށް ހެލްތު މިނިސްޓަރު އަބްދުﷲ ނާޒިމް އިބްރާހިމް ވިދާޅުވެއްޖެއެވެ.

ބޭހާ ގުޅުން ހުރި މައްސަލަތަކަށް ދާއިމީ ހައްލެއް ގެނައުމަށް ހާއްސަ ކުންފުންޏެއް އުފައްދަން ކެބިނެޓުން ނިންމާފައިވާ ކަމަށާއި އަދި ލަސްތަކެއް ނުވެ، އެކުންފުނި ވުޖޫދަށް ގެންނާނެކަމަށް ރާއްޖޭގެ އޮންލައިން މީޑިޔާއަކަށް މަޢުލޫމާތު ދެއްވަމުން މިނިސްޓަރ ނާޒިމް ވިދާޅުވިއެވެ.

Ad by Hajj Corporation

ރާއްޖެއިން ބައެއް ބޭސްތައް ލިބުމުގައި ކުރިމަތިވާ ދަތިތަކަށް ހައްލެއް ހޯދުމަށް، އެސްޓީއޯއިން ވަނީ ދާދިފަހުން އިންޑިއާ ސަރުކާރުގެ ދަށުން ހިންގާ ކުންފުންޏެއް ކަމަށްވާ އެޗްއެލްއެލް ލައިފްކެއާ ލިމިޓެޑާއެކު އެއްބަސްވުމެއްގައި ސޮއިކޮށްފައެވެ.

މިފަދަ އެއްބަސްވުމެއް ވެވުނީ މިދިޔަ ދެތިން މަހުގައި ރާއްޖޭގައި މުހިންމު ބޭސްތަކެއް ލިބުން ދަތިވެ، ސިއްހީ ނިޒާމަށް ކުރިމަތިވެފައިވާ ގޮންޖެހުންތަކަށް ސީދާ އަދި ދާއިމީ ހައްލެއް ހޯދުމުގެ މަގްސަދުގައެވެ.

ބޭސް އެތެރެކޮށް، ތަންތަނަށް އެ ފޮނުވުމަށް ވަކި ކުންފުންޏެއް އުފެއްދުމުން، ބޭހާ ގުޅޭގޮތުން އެސްޓީއޯއިން މިހާރު ކުރާ ހުރިހާ މަސައްކަތެއް ދެން ބަދަލުވާނީ އައު ކުންފުންޏަށް ކަމަށް ނާޒިމް ވިދާޅުވެފައި ވެއެވެ.