ބޮލީވުޑްގެ މަޝްހޫރު ތަރި އަދި ލަވަކިޔުންތެރިޔާ ނޯރާ ފަތޭހީ، ވޯލްޑް ކަޕް ހުޅުވުމުގެ ރަސްމިއްޔާތުގައި ކެނެޑާގައި އޭނާގެ ރަސްމީ ފީފާ ލަވަ "ސީރް ސީރް" ހުށަހަޅައިދީފައިވާއިރު، މޮރޮކޯގެ ދަރިކޮޅަށް ނިސްބަތްވާ ކެނެޑާގެ މި ފަންނާނު ބުނާ ގޮތުގައި މި ލަވައިގެ މައިގަނޑު މެސެޖަކީ އުފާފާޅުކުރުމާއި، އެއްބައިވަންތަކަމާއި އަދި ތަމްސީލުކޮށްދިނުމެވެ.

Ad by Hajj Corporation

މި ލަވައަކީ މޮރޮކޯގެ ފުޓްބޯޅަ ސަޕޯޓަރުން ބޭނުންކުރާ މަޝްހޫރު ސަގާފީ ބަހެއް ކަމަށްވާ "ސީރް ސީރް" (މާނައަކީ: ދާށެވެ، ދާށެވެ) އަށް ބިނާކޮށް އުފައްދާފައިވާ ލަވައެކެވެ. ނޯރާ އުންމީދު ކުރަނީ މި ލަވައަކީ މުޅި ދުނިޔޭގެ ހުރިހާ ޓީމުތަކަކަށް ވެސް ހިތްވަރު ލިބިގެންދާނެ ލަވައަކަށް ވެގެންދިއުމަށެވެ. ބީބީސީ ނިއުސްބީޓަށް ދިން އިންޓަވިއުއެއްގައި ނޯރާ ބުނީ މިއީ މިއުޒިކާއި ފުޓްބޯޅަ ގުޅިގެން ތަފާތު ސަގާފަތްތައް ދައްކާލުމަށް ލިބޭ ރަނގަޅު ފުރުސަތެއް ކަމަށެވެ.

އުމުރުން 22 އަހަރުގައި ކެނެޑާ ދޫކޮށް އިންޑިއާއަށް ހިޖުރަކުރި ނޯރާއަށް، އޭނާގެ އުފަން ރަށުގައި މިފަދަ ބޮޑު ހަރަކާތެއްގައި ބައިވެރިވުމަކީ ވަރަށް ހާއްސަ ކަމެކެވެ. 

"މިއީ ހުވަފެން ދެކެން ކެރުނު މީހެއްގެ ވާހަކަ. އަހަރެން ބޭނުންވަނީ މިއީ އެހެން މީހުންނަށް ވެސް ހިތްވަރަކަށް ވާން،" ނޯރާ ބުންޏެވެ.

އޭނާ މި ހަރަކާތަށް ތައްޔާރުވުމުގެ ގޮތުން ގިނަ ރިހާސަލްތަކެއް ކުރިއަށް ގެންދިޔަ ކަމަށް ވެސް ބުންޏެވެ.

މި ލަވައިގެ މިއުޒިކް ވީޑިއޯ ކުޅެފައިވަނީ މޮރޮކޯގެ މަގުތަކުގައެވެ. އޭގެ ބޭނުމަކީ ކުޑަކުދިން މަގުމަތީގައި ކުޅޭ ކުޅިވަރަކުން ފެށިގެން ދުނިޔޭގެ ބޮޑެތި ސްޓޭޑިއަމްތަކާ ހަމައަށް ފުޓްބޯޅަ ކުރާ ދަތުރު ދައްކުވައިދިނުމެވެ. ނޯރާގެ އިތުރުން ޝަކީރާ، ބާނާ ބޯއީ، ސްޓޯމްޒީ އަދި ދަ ރޯލިންގް ސްޓޯންސް ފަދަ މަޝްހޫރު ފަންނާނުންގެ ލަވަތައް ވެސް މިއަހަރުގެ ވޯލްޑް ކަޕް ޕްލޭލިސްޓުގައި ހިމެނެއެވެ.