ދިވެހިރާއްޖޭގެ ފަތުރުވެރިކަން އިތުރަށް ކުރިއަރުވައި، ރަޝިޔާ މާކެޓުގައި ރާއްޖެއަށް އޮތް މަޤުބޫލުކަން ދެމެހެއްޓުމަށްޓަކައި ވިޒިޓް މޯލްޑިވްސްއިން "މޯލްޑިވިއާނާ" އާ ގުޅިގެން ޚާއްޞަ ޑިޖިޓަލް މާކެޓިންގ ކެމްޕޭނެއް ކުރިއަށް ގެންގޮސްފިއެވެ. މި ކެމްޕެއިން ކުރިއަށް ގެންގޮސްފައިވަނީ 15 މެއި އިން ފެށިގެން 15 ޖޫން 2026 ގެ ނިޔަލަށެވެ.

މި ކެމްޕެއިންގެ މައިގަނޑު މަޤުސަދަކީ ރާއްޖޭގެ ފަތުރުވެރިކަމުގެ ބްރޭންޑް އިތުރަށް ބާރުވެރިކުރުމާއި، އޮންލައިން މީޑިއާތަކުގައި ދިވެހިރާއްޖެއާ މެދު އޮންނަ ޝައުޤުވެރިކަން އިތުރުކުރުމެވެ. މީގެ އިތުރުން، ރަޝިޔާގެ ފަތުރުވެރިން ރާއްޖޭގެ ރަސްމީ ފަތުރުވެރިކަމުގެ ޑިޖިޓަލް ޕްލެޓްފޯމްތަކަށް ޒިޔާރަތް ކުރާ މިންވަރު އިތުރުކުރުމަކީ ވެސް މި ހަރަކާތުގެ މުހިންމު ބައެކެވެ.

Ad by Hajj Corporation

މޯލްޑިވިއާނާއާއެކު ޑިޖިޓަލް ވަސީލަތްތަކުގެ ބޭނުން ހިފުން

މޯލްޑިވިއާނާއަކީ 1994 ވަނަ އަހަރުން ފެށިގެން ރާއްޖެއާއި ރަޝިޔާގައި ފަތުރުވެރިކަމުގެ ޚިދުމަތް ދެމުންދާ، އަދި މާލެއާއި މޮސްކޯގައި އޮފީސްތައް ޤާއިމުކޮށްފައިވާ ތަޖުރިބާކާރު ޓްރެވަލް އޮޕަރޭޓަރެކެވެ. ވިޒިޓް މޯލްޑިވްސްއިން ބުނި ގޮތުގައި، މި އިސްނެގުމުގެ ދަށުން ޑިޖިޓަލް ވަސީލަތްތައް ބޭނުންކޮށްގެން ރާއްޖޭގެ ރީތިކަމާއި ތަފާތު ތަޖުރިބާތައް ސިފަކޮށްދޭ ކޮންޓެންޓްތައް ދައްކާލުމަށް ވަނީ ރޭވިފައެވެ.

މީގެ އިތުރުން، އަމާޒުކޮށްފައިވާ ޑިޖިޓަލް އިޝްތިހާރުތަކާއި ޕްރޮމޯޝަންތަކުގެ އެހީގައި ރަޝިޔާ މާކެޓުގައި ރާއްޖޭގެ މަޤުބޫލުކަން އިތުރުކޮށް، އޮންލައިން ޕްލެޓްފޯމްތައް މެދުވެރިކޮށް ފަތުރުވެރިން ރާއްޖެއަށް ދަތުރުކުރުމަށް ބާރުއެޅުން ހިމެނެއެވެ. މިގޮތުން ހިންގާ ޕްރޮމޯޝަނަލް ހަރަކާތްތަކުގެ ސަބަބުން ރާއްޖެއަށް ބުކިންގްސް ހަދާ މިންވަރު އިތުރުވެގެންދާނެ ކަމަށް ބެލެވެއެވެ.

ރަޝިޔާ މާކެޓުގެ މުހިންމުކަން

ރަޝިޔާއަކީ ދިވެހިރާއްޖޭގެ ފަތުރުވެރިކަމުގައި އެންމެ މުހިންމު އެއް މާކެޓެވެ. ވިޒިޓް މޯލްޑިވްސްއިން ފާހަގަކުރާ ގޮތުގައި، މި ކެމްޕޭނަކީ އެ މާކެޓުގައި ރާއްޖޭގެ ހިއްސާ ވަރުގަދަކޮށް ހިފެހެއްޓުމަށް ކުރާ މުހިންމު މަސައްކަތެކެވެ. ރަޝިޔާއަކީ މިވަގުތު ރާއްޖެއަށް ދެވަނައަށް އެންމެ ގިނައިން ފަތުރުވެރިން ޒިޔާރަތް ކުރާ ޤައުމެވެ.

ތަފާސްހިސާބުތަކަށް ބަލާއިރު، މިއަހަރުގެ މިހާތަނަށް ރަޝިޔާއިން 112,718 ފަތުރުވެރިން ރާއްޖެއަށް ޒިޔާރަތް ކޮށްފައިވެއެވެ. މިއީ ރާއްޖެއަށް ޒިޔާރަތްކުރި ޖުމްލަ ފަތުރުވެރިންގެ 13.4 އިންސައްތައެވެ.