ޕީއެންސީ ސަރުކާރުން ވަކި ޕާޓީއަކަށް ނިސްބަތްވާތީ އެއްވެސް މީހަކު ވަޒީފާއިން ވަކިކޮށްފައި ނުވާނެ ކަމަށާއި، ޕީއެންސީން އަބަދުވެސް އިސްކުރާނީ ގައުމީ ފިކުރު ކަމަށް އިޤްތިސާދީ ތަރައްޤީއާއި ވިޔަފާރިއާ ބެހޭ ވަޒީރު މުޙައްމަދު ސައީދު ވިދާޅުވެއްޖެއެވެ.

ވަޒީރު ސައީދު މިހެން ވިދާޅުވީ، ރައްޔިތުންގެ މަޖިލީހުގެ ބާރަށު ދާއިރާގެ މެންބަރު އިބްރާހިމް ޝުޖާއު ކުރެއްވި ޕޯސްޓަކަށް ރީޓުވީޓު ކުރައްވަމުންނެވެ.

Ad by Hajj Corporation

ސައީދުގެ ޕޯސްޓުގައި އެމްޑީޕީގެ ސިޔާސަތުތަކަށް ވަރަށް ބޮޑަށް ފާޑުވިދާޅުވެފައިވެއެވެ. އެގޮތުން އެމްޑީޕީއަށް ވެރިކަން ލިބުނު ދެ ފަހަރުވެސް ފެނިގެންދިޔައީ އެއް މަންޒަރެއްކަން ފާހަގަކުރައްވައި، ސައީދު ވިދާޅުވީ އެ ޕާޓީގެ ފިކުރު ނޫން އެހެން ކޮންމެ މީހަކު ވަޒީފާ ދޫކޮށް ދާންޖެހޭނެ ކަމަށް ބުނެ އަމަލުން އެކަން ދައްކާފައިވާ ކަމަށެވެ.

ނަމަވެސް، މިހާރުގެ ޕީއެންސީ ސަރުކާރުން ވަކި ޕާޓީއަކަށް ނިސްބަތްވާތީ އެއްވެސް މީހަކު ވަޒީފާއިން ވަކިކޮށްފައި ނުވާނެކަމަށް ވަޒީރު ވިދާޅުވިއެވެ.

"އެމްޑީޕީއަށް އަށް ވެރިކަންލިބުނު 2 ފަހަރުވެސް ހަމަދެއްކީ އެއްވާހަކައެއްނޫންތޯ. ތިމަންނަމެންގެ ޕާޓީނޫން އެންމެންޖެހޭނީ ވަޒީފާދޫކޮށްދާށޭ. އަދި ޢަމަލުންވެސް އެކަންދެއްކިނޫންތޯ؟ މިހާރުވެދާނެ އެކަން ހަނދުމަފުޅުގައި ނެތީކަމަށް.ޕީއެންސީގެ ސަރުކާރުން މިޕާޓީއަށް ނިސްބަތްނުވާތީ ވަޒީފާއިން ވަކިކުރި އެއްވެސްފަރާތެއް ނުދެއްކުނުނޫންތޯ؟ ޕީއެންސީ އަބަދުވެސް އިސްކުރާނީ ޤައުމީފިކުރު" އިޤްތިސާދީ ތަރައްޤީއާއި ބެހޭ ވަޒީރު މުޙައްމަދު ސައީދު

މި މައްސަލައިގައި މެންބަރު އިބްރާހިމް ޝުޖާއު ކުރެއްވި ޕޯސްޓުގައި، އެމްޑީޕީގެ ކުރީގެ ޗެއާޕާސަން ފައްޔާޒު އިސްމާޢީލަށް އަމާޒުކޮށް ވިދާޅުވީ، ދާއިރާތަކުގެ ރައީސުންނަށް ކޯފާ އިސްކުރެއްވުމުގެ ބަދަލުގައި އެމްޑީޕީގެ ވެރިކަމުގައި ސިޔާސީ ނުފޫޒުން ވަޒީފާތަކުން ވަކިކުރި މީހުންގެ ހާލަތަށް ބެއްލެވުމަށެވެ. އަދި މިއަދު އެމްޑީޕީން މުޒާހަރާއަށް ނިކުންނަން އުޅުނަސް، އެމީހުންގެ ކުރިމައްޗަށް ނިކުންނާނީ އެމްޑީޕީގެ ވެރިކަމުގައި ވަޒީފާއިން ވަކިކުރި ޗިޓްތައް ހިފައިގެން ތިބި މުވައްޒަފުން ކަމަށް ޝުޖާއު ވިދާޅުވިއެވެ.