ސިއެޓްލް ސްޓޭޑިއަމްގައި އޮސްޓްރޭލިއާ އަތުން 2-0 އިން މޮޅުވެ، ވޯލްޑް ކަޕްގެ ގަދަ 32 ގެ ބުރުން އެމެރިކާ ޖާގަ ހޯދައިފިއެވެ. ގްރޫޕް ޑީ ގައި ހިމެނޭ މި ދެ ޓީމުވެސް ފުރަތަމަ މެޗުން މޮޅުވެފައިވުމާއެކު، މި މެޗުން މޮޅުވާ ޓީމަކަށް ދެވަނަ ބުރުގެ ޖާގަ ކަށަވަރުވާނެކަން ކުރިންވެސް އޮތީ އެނގިފައެވެ.

މެޗުގެ ފުރަތަމަ 40 ސިކުންތުގެ ތެރޭގައި އޮސްޓްރޭލިއާގެ މުހައްމަދު ތޫރޭއަށް ލަނޑު ޖަހާނެ ރަނގަޅު ފުރުސަތެއް ލިބުނު ނަމަވެސް، އެމެރިކާގެ ކީޕަރު މެޓް ފްރީޒް ވަނީ އެ ބޯޅަ ހުޝިޔާރުކަމާއެކު ދިފާއުކޮށްފައެވެ. އެމެރިކާއިން މެޗުގެ ކޮންޓްރޯލް ހޯދައި، 11 ވަނަ މިނެޓުގައި ކުރި ހޯދީ އޮސްޓްރޭލިއާގެ ކެމަރަން ބާޖެސް އަތުން ބައިކޮޅަށް ވަން ލަނޑަކުންނެވެ. މިއީ ފޮލަރިން ބަލޮގުން ފޮނުވާލި ހުރަހެއް ދިފާއުކުރަން އުޅުމުގެ ތެރޭގައި ވަން ލަނޑެކެވެ.

Ad by Hajj Corporation

އެމެރިކާގެ ދެވަނަ ލަނޑު ފުރަތަމަ ހާފު ނިމެން ދެ މިނެޓަށް ވެފައި ވަނިކޮށް ކާމިޔާބުކޮށްދިނީ އެލެކްސް ފްރީމަންއެވެ. ސާޖީނިއޯ ޑެސްޓް ފޮނުވާލި ހަމަލާއެއް ބްލޮކްވެފައި މައްޗަށް އެރި ވަގުތު، ފްރީމަން ވަނީ ބޮލުން ބޯޅަ ގޯލުގެ ތެރެއަށް ފޮނުވާލާފައެވެ. ފުރަތަމަ އޮފްސައިޑް ކަމަށް ނިންމި ނަމަވެސް، ވީއޭއާރް ބެލުމަށްފަހު ރެފްރީ ވަނީ އެއީ ސައްހަ ލަނޑެއް ކަމަށް ނިންމާފައެވެ.

ޕުލިސިޗް ނެތަސް އެމެރިކާގެ ފެންވަރު ދައްކާލައިފި

އަނިޔާގެ ސަބަބުން ކްރިސްޓިއަން ޕުލިސިޗް ނުކުޅުނު ނަމަވެސް، އޭނާގެ ބަދަލުގައި ކުޅެން އެރި ރިކާޑޯ ޕެޕީ އާއި ބަލޮގުން ވަނީ އޮސްޓްރޭލިއާގެ ޑިފެންސަށް ބާރުބޮޑުކޮށްފައެވެ. މިއީ 1994 ވަނަ އަހަރަށްފަހު ވޯލްޑް ކަޕެއްގައި އެމެރިކާގެ ޑިފެންޑަރަކު ލަނޑު ޖެހި ދެވަނަ ފަހަރެވެ. މީގެ ކުރިން 2014 ވަނަ އަހަރު ގާނާއާ ދެކޮޅަށް ޖޯން ބްރޫކްސް ވަނީ ލަނޑު ޖަހާފައެވެ.

މި މޮޅާއެކު އެމެރިކާ މިވަނީ މި މުބާރާތުގައި ޖުމްލަ 6 ލަނޑު ޖަހާފައެވެ. އެ ޓީމުގެ އެންމެ ރަނގަޅު ރެކޯޑަކީ 1930 އަދި 2002 ވަނަ އަހަރުގެ މުބާރާތުގައި ޖެހި 7 ލަނޑެވެ. ގްރޫޕްގެ ފަހު މެޗުގައި ތުރުކީއާ ދެކޮޅަށް ކުޅޭއިރު، އެ ރެކޯޑް މުގުރާލުމުގެ ފުރުސަތު އެމެރިކާއަށް އެބައޮތެވެ.

އޮސްޓްރޭލިއާއަށް ދެން އޮތީ ގްރޫޕްގެ ފަހު މެޗުގައި ޕެރަގުއޭއާ ދެކޮޅަށް ކުޅޭ މެޗެވެ. ދެވަނަ ބުރަށް ދިއުމަށްޓަކައި އެ މެޗުން މޮޅުވުން އޮސްޓްރޭލިއާއަށް މަޖުބޫރުވާނެއެވެ. މި ދެ މެޗުވެސް ކުޅުމަށް ހަމަޖެހިފައިވަނީ ޖޫން މަހުގެ 25 ވަނަ ދުވަހުއެވެ.