2026 ވަނަ އަހަރުގެ ވޯލްޑް ކަޕްގައި ބްރެޒިލުން ކުޅުނު ފުރަތަމަ މެޗުން އެއްވަރުވުމަށްފަހު، ފިލަޑެލްފިއާ ސްޓޭޑިއަމްގައި ހައިޓީއާ ދެކޮޅަށް ކުޅުނު މެޗު 3-0 އިން ކާމިޔާބުކޮށް ބްރެޒިލުން ފުރަތަމަ މޮޅު ހޯދައިފިއެވެ. މި މޮޅާއެކު ކާލޯ އަންޗެލޮޓީގެ އިރުޝާދުގެ ދަށުން ކުޅޭ ބްރެޒިލް ވަނީ ގްރޫޕް ސީގެ އެއްވަނައަށް ޖެހިލާފައެވެ.

މި މެޗުގައި ބްރެޒިލްގެ ފުރަތަމަ އެގާރައިން ފުރުސަތު ހޯދި މަތިއަސް ކޫންޔާ ވަނީ ދެ ގޯލު ކާމިޔާބުކޮށްފައެވެ. މެޗުގެ 23 ވަނަ މިނެޓުގައި ކޫންޔާ ފުރަތަމަ ލަނޑު ޖެހީ ހައިޓީގެ ޑިފެންޑަރު ހެނެސް ޑެލްކްރޮއިކް ސަލާމަތްކުރަން އުޅުނު ބޯޅައެއްގައި ޖެހި ބައިކޮޅަށް ވަން ގޯލަކުންނެވެ. އޭގެ ފަހުން ވިނީޝިއަސް ޖޫނިއާ ތަނަވަސްކޮށްދިން ފުރުސަތެއްގައި ކޫންޔާ ވަނީ އޭނާގެ ދެވަނަ ލަނޑު ކާމިޔާބުކޮށްފައެވެ.

Ad by Hajj Corporation

ބްރެޒިލްގެ ތިންވަނަ ލަނޑު ފުރަތަމަ ހާފުގެ އިތުރު ވަގުތުގައި ކާމިޔާބުކޮށްދިނީ ވިނީޝިއަސް ޖޫނިއާއެވެ. ލޫކަސް ޕަކޭޓާ ދިން ރީތި ބޯޅައެއް ހިފައިގެން އޭރިއާ ތެރެއަށް ވަދެ، ވިނީޝިއަސް ވަނީ ހައިޓީގެ ކީޕަރުގެ ފައިދަށުން ބޯޅަ ގޯލަށް ފޮނުވާލާފައެވެ. މި ލަނޑާއެކު ވިނީޝިއަސް ވެފައިވަނީ 21 ވަނަ ގަރުނުގައި ވޯލްޑް ކަޕެއްގެ ފުރަތަމަ ދެ މެޗުގައި ތިން ގޯލް ކޮންޓްރިބިއުޝަން (ދެ ގޯލާއި އެއް އެސިސްޓް) ހަމަކުރި ތިންވަނަ ބްރެޒިލް ކުޅުންތެރިޔާއަށެވެ.

މެޗުގެ ދެވަނަ ހާފުގައި ހައިޓީން ބްރެޒިލްގެ ގޯލަށް ނުރައްކާކުރަން މަސައްކަތް ކުރިއެވެ. އެގޮތުން 63 ވަނަ މިނެޓުގައި ހައިޓީގެ ރިކާޑޯ އަޑޭ ބޮލުން ފޮނުވާލި ނުރައްކާތެރި ބޯޅައެއް ބްރެޒިލްގެ ކީޕަރު އެލިސަން ވަނީ ހުޝިޔާރުކަމާއެކު ދިފާއުކޮށްފައެވެ. މީގެ އިތުރުން ބްރެޒިލްގެ ޒުވާން ތަރި އެންޑްރިކް ބަދަލު ކުޅުންތެރިއެއްގެ ގޮތުގައި ކުޅެން އަރައި ވޯލްޑް ކަޕްގައި އަލަށް ކުޅެފައެވެ. އޭނާ ޖެހި ގޯލެއް އޮފްސައިޑްވުމުން ބަލައިނުގަތުމަށް ނިންމިއެވެ.

މި މެޗުގައި ބްރެޒިލްގެ ޑިފެންސް ފެނުނީ ވަރުގަދަކޮށެވެ. ފުރަތަމަ ހާފުގައި ހައިޓީއަށް ބްރެޒިލްގެ ގޯލަށް އެންމެ ހަމަލާއެއްވެސް ފޮނުވާލެވިފައެއް ނުވެއެވެ. މިއީ 1990 ވަނަ އަހަރު ސްކޮޓްލޭންޑާ ދެކޮޅަށް ކުޅުނު މެޗަށްފަހު ބްރެޒިލުން ވޯލްޑް ކަޕް މެޗެއްގެ ފުރަތަމަ ހާފުގައި އިދިކޮޅު ޓީމަށް އެއްވެސް ހަމަލާއެއް ދިނުމުގެ ފުރުސަތު ނުދީ ހިފެހެއްޓި ފުރަތަމަ ފަހަރެވެ.

ބްރެޒިލަށް މި މެޗުގައި ކުރިމަތިވި ހަމައެކަނި ކަންބޮޑުވުމަކީ މެޗުގެ 40 ވަނަ މިނެޓުގައި ބާސެލޯނާގެ ވިންގަރ ރަފީނިއާއަށް ލިބުނު އަނިޔާއެވެ. އޭނާގެ ފައިގެ ފަހަތު މަސްގަނޑަށް (ހެމްސްޓްރިންގް) އަނިޔާވެގެން ވަނީ ބަދަލުކޮށްފައެވެ. މިއީ ކުރިއަށް ހުރި މެޗުތަކަށް ބަލާއިރު އަންޗެލޮޓީގެ ޓީމަށް ކުރިމަތިވެދާނެ ގޮންޖެހުމެކެވެ.