2025 ވަނަ އަހަރުގެ އިންކަމް ޓެކްސް ބަޔާން ހުށަހެޅުމަށް ކަނޑައަޅާފައިވާ އެންމެ ފަހުގެ ސުންގަޑިއަށް ބާކީ އޮތީ އެންމެ 3 ދުވަސް ކަމަށް މޯލްޑިވްސް އިންލަންޑް ރެވެނިއު އޮތޯރިޓީ (މީރާ) އިން ހާމަކޮށްފިއެވެ.

މެންދުރު ޓީވީގެ 'މައުޟޫ' ޕްރޮގްރާމްގައި ވާހަކަދައްކަވަމުން މީރާގެ ޑެޕިއުޓީ ޑިރެކްޓަރު، އޮބްޖެކްޝަންސް، އަމީނުﷲ ނަސީރު ވިދާޅުވީ، އާމްދަނީން ޓެކްސް ނެގުމުގެ ގާނޫނުގެ ދަށުން ހުށަހަޅަންޖެހޭ މި ބަޔާން ހުށަހެޅުމުގެ އެންމެ ފަހު ތާރީޚަކީ މި ހިނގާ ޖޫން މަހުގެ 30 ވަނަ ދުވަސް ކަމަށެވެ. އަދި މި މުއްދަތުގެ ތެރޭގައި ހުރިހާ ފަރާތްތަކުން ވެސް ބަޔާން ހުށަހަޅައި، ޓެކްސް ދައްކަންޖެހޭ ފަރާތްތަކުން ފައިސާ ދައްކައި ނިންމުމަށް އޭނާ އިލްތިމާސްކުރެއްވިއެވެ.

Ad by Hajj Corporation

ޓެކްސް ދައްކާ ފަރާތްތަކަށް ލުއިފަސޭހަކޮށްދިނުމުގެ ގޮތުން، އިންކަމް ޓެކްސް ބަޔާން މީރާގެ އޮންލައިން ޕޯޓަލް 'މީރާކަނެކްޓް' މެދުވެރިކޮށް ހުށަހެޅޭނެ އިންތިޒާމު ވަނީ ހަމަޖައްސާފައެވެ.

އިންކަމް ޓެކްސްއަކީ ދައުލަތަށް ލިބޭ އާމްދަނީގެ ބޮޑު ބައެއް ހިއްސާކުރާ މުހިންމު ޓެކްސްއެކެވެ. ރާއްޖޭގައި އާމްދަނީން ޓެކްސް ނެގުމުގެ ގާނޫނު ފާސްކުރީ 17 ޑިސެންބަރު 2019 ގައެވެ. މި ގާނޫނުގެ ދަށުން އިންކަމް ޓެކްސް ނަގަން ފަށާފައިވަނީ 1 ޖެނުއަރީ 2020 ގައެވެ. ނަމަވެސް، މުވައްޒަފުންގެ އުޖޫރައިން ޓެކްސް ނަގަން ފަށާފައިވަނީ 1 އެޕްރިލް 2020 އިން ފެށިގެންނެވެ. އިންކަމް ޓެކްސް ގާނޫނު އައުމުގެ ކުރިން ރާއްޖޭގައި އަމަލުކުރަމުން ދިޔައީ ވިޔަފާރި ފައިދާއިން ޓެކްސް ނެގުމުގެ ގާނޫނަށެވެ.

ޓެކްސް ދައްކަންޖެހޭ މިންގަނޑުތައް:
ފަރުދުން: އަހަރެއްގެ މައްޗަށް ޓެކްސް ބިނާކުރެވޭ އާމްދަނީ 720,000 (ހަތްލައްކަ ވިހިހާސް) ރުފިޔާއަށް ވުރެ އިތުރުވާ ފަރާތްތައް.
ކުންފުނިތައް: އަހަރެއްގެ މައްޗަށް ޓެކްސް ބިނާކުރެވޭ އާމްދަނީ 500,000 (ފަސްލައްކަ) ރުފިޔާއަށް ވުރެ އިތުރުވާ ކުންފުނިތައް.

ސުންގަޑި ހަމަވުމުގެ ކުރިން ބަޔާން ހުށަނާޅާ ފަރާތްތަކަށް ގާނޫނުގެ ދަށުން ޖޫރިމަނާ އަންނާނެތީ، ވީހާވެސް އަވަހަށް ބަޔާންތައް ހުށަހަޅައި ނިންމުމަށް މީރާ އިން އިރުޝާދު ދެއެވެ.