އަމާޒު ވަރަށް ސާފު ކަމަށާއި މި ދެ އަހަރު ކުދި އަދި މެދު ފަންތީގެ ކޮންމެ ވިޔަފާރިވެރިއަކަށް ވެސް ކުރިއަރައިދިއުމަށް ބޭނުންވާ އެހީތެރިކަން ލިބޭނެ އިގުތިސޯދެއް ބިނާކުރުމުގައި ސަރުކާރުން ދެމިތިބޭނެ ކަމަށް ރައީސުލްޖުުމްހޫރިއެްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ ބައިނަލްއަގްވާމީ ކުދި އަދި މެދުފަންތީގެ ވިޔަފާރިތަކުގެ ދުވަހުގެ މުނާސަބަތުގައި ކުރެެއްވި ސޯޝަލްމީޑިއާ ޕޯސްޓެއްގައެވެ.

Ad by Hajj Corporation

ރައީސް ވިދާޅުވީ މިއަހަރު އަދި 2027 ވަނަ އަހަރަކީ ކުދި އަދި މެދު ފަންތީގެ ވިޔަފާރިތައް ކުރިއެރުވުމަށް ހާއްސަ ކުރެވިފައިވާ އަހަރުތަކެއް ކަމަށެވެ. އަދި ރާއްޖޭގެ އިގްތިސޯދުގެ ވަރުގަދަކަން ބިނާވެފައިވަނީ، ރާއްޖޭގެ އެކި ކަންކޮޅުތަކުގައި ކުރިއެރުން ހޯދައިދީ، ފުރުސަތުތައް ފަހިކޮށްދޭ އެތައް ހާސް ކުދި އަދި މެދު ފަންތީގެ ވިޔަފާރިތަކުގެ މައްޗަށް ކަމަށް ވެސް ވިދާޅުވިއެވެ.

މީގެއިތުރުން ބައިނަލްއަގުވާމީ ކުދި އަދި މެދު ފަންތީގެ ވިޔަފާރިތަކުގެ ދުވަހު، ވަރުގަދަ އަދި ވިލުންތެރި ދިވެހި އިގްތިސޯދެއް ބިނާކުރުމަށް އެ ފަރާތްތަކުން ކުރާ މަސައްކަތުގެ އަގު ވަޒަންކުރައްވާ ކަމަށާއި 'މޯލްޑިވްސް 2.0' ގެ ދަށުން، މާލީ އެހީތެރިކަމާއި، ޑިޖިޓަލް ވަސީލަތްތަކާއި އިންފްރާސްޓްރަކްޗާ އަދި ބައިނަލްއަގުވާމީ މާކެޓްތަކަށް އޮތް ފުރުސަތުތައް ސަރުކާރުން ފުޅާކުރަމުންދާ ކަމަށެވެ.

ސަގާފީ ތަރިކަ އާއި ފަންނުވެރިންނަށް އެހީތެރިވެދޭ ސަގާފީ މަރުކަޒުތަކުން ފެށިގެން، 'ކްރިއޭޓާ ހަބް' އާއި، އެސްއެމްއީ ޑިޖިޓަލް ފައިނޭންސިން، އަދި އަލީބާބާ އާއި ޕޭޕަލް މެދުވެރިކޮށް ބައިނަލްއަގުވާމީ މާކެޓްތަކަށް މަގުފަހިކޮށްދިނުމާއެކު، ކުރިއެރުމާއި ކާމިޔާބީއަށް އާ މަގުތަކެއް ކޮށައިދެމުންދާކަން ރައީސް ވަނީ ފާހަގަކުރައްވާފައެވެ.