މަސްވެރިކަމުގެ ސިނާއަތުގައި ހަރަކާތްތެރިވާ އަދި މި ސިނާއަތަށް ޝައުގުވެރިވާ ފަރާތްތަކަށް އަމާޒުކޮށްގެން މިނިސްޓްރީ އޮފް ފިޝަރީޒް، އެގްރިކަލްޗަރ އެންޑް އޯޝަން ރިސޯސަސްއިން ކުރިއަށްގެންދާ ތަމްރީނު ޕްރޮގްރާމްތައް ބޭއްވުމަށް ބޭނުންވާ ރަށްތަކަށް އެ ފުރުސަތު މިއަދު ހުޅުވާލައިފިއެވެ.

މި ތަމްރީނު ޕްރޮގްރާމްތަކަކީ ރަށު ކައުންސިލްތަކާ ގުޅިގެން ކުރިއަށް ގެންދިއުމަށް ހަމަޖެހިފައިވާ ޕްރޮގްރާމްތަކެކެވެ.

Ad by Hajj Corporation

މި ތަމްރީނުތަކުގެ މައިގަނޑު މަޤްސަދަކީ މަސްވެރިކަމުގެ ދާއިރާއަށް ޒުވާނުން އަހުލުވެރިކުރުވުމާއި، މަހާއި މަހުގެ އަގުއެއްކުރި އުފެއްދުންތައް އިތުރުކޮށް އައު މާކެޓްތައް ހޯދުމެވެ. މީގެ އިތުރުން މަސްވެރިކަމުގެ އައު ބާވަތްތައް ތައާރަފްކޮށް، އެކަމަށް ޝައުގުވެރިވާ ފަރާތްތަކަށް ބޭނުންވާ ހުނަރުތައް ދަސްކޮށްދިނުމަކީވެސް މި ޕްރޮގްރާމްގެ އަމާޒެކެވެ.

މިނިސްޓްރީން ބުނި ގޮތުގައި މި ޕްރޮގްރާމްގެ ދަށުން މަސްވެރި ސިނާއަތުގައި ކަނބަލުންގެ ހިއްސާ އިތުރުކޮށް، ރަށު ފެންވަރުގައި މަސްވެރި އުފެއްދުންތައް މިހާރަށްވުރެ ފެންވަރު ރަނގަޅުކޮށް ތައްޔާރުކުރުމަށް ބޭނުންވާ ތަމްރީނުތައް ދެވޭނެއެވެ. މީގެ ތެރޭގައި ތަފާތު ބާވަތްތަކުގެ އުފެއްދުންތައް ތައްޔާރުކުރުމަށް އަހުލުވެރިކުރުވުން ހިމެނެއެވެ.

2026 ވަނަ އަހަރަށް ތާވަލުކުރެވިފައިވާ ތަމްރީނުތައް

2026 ވަނަ އަހަރު މިނިސްޓްރީގެ ފަރާތުން ކުރިއަށްގެންދިއުމަށް ހަމަޖެހިފައިވަނީ މައިގަނޑު ދެ ތަމްރީނު ޕްރޮގްރާމެކެވެ. އެއީ:

• ޑައިމަންޑް ބެކް ސްކުއިޑް (ތުތި ބޯވަދިލަމަސް) ގެ މަސްވެރިކަމުގެ ތަމްރީން ޕްރޮގްރާމް.
• އަގުއެއްކުރި މަހުގެ އުފެއްދުން ތައްޔާރުކުރުމާއި ކުދި ވިޔަފާރި ހިންގާ ބެލެހެއްޓުމުގެ ތަމްރީން ޕްރޮގްރާމް.

މި ތަމްރީނުތައް އެ ރަށެއްގައި ހިންގުމަށް ޝައުގުވެރިވާ ރަށު ކައުންސިލްތަކުން، 15 ޖުލައި 2026 ވާ ބުދަ ދުވަހުގެ އޮފީސް ބަންދުވުމުގެ ކުރިން މިނިސްޓްރީއަށް ސިޓީ ހުށަހަޅަންޖެހެއެވެ. ސިޓީ ހުށަހަޅާއިރު އެ ރަށެއްގައި ކުރިއަށް ގެންދަން ބޭނުންވާ ވަކި ތަމްރީނެއް ސާފުކޮށް ބަޔާންކުރަންވާނެ ކަމަށް މިނިސްޓްރީން މައުލޫމާތުދެއެވެ.