ރާއްޖޭގެ އެތެރޭގެ ވައިގެ އުދުހުންތަކުގެ އަގުތައް އަދިވެސް ހުރީ އާންމުންނަށް އެންމެ އެކަށީގެންވާ މިންވަރެއްގައި ނޫން ކަމަށާއި، ނަމަވެސް އެ އަގުތައް ކުޑަކުރުމަށް ބޮޑެތި ހުރަސްތަކެއް އެބަހުރި ކަމަށް ޓޫރިޒަމް އަދި ސިވިލް އޭވިއޭޝަން މިނިސްޓަރު މުހައްމަދު އަމީން މިއަދު ވިދާޅުވެއްޖެއެވެ.

ރައްޔިތުންގެ މަޖިލީހުގައި މެންބަރަކު ކުރެއްވި ސުވާލަކަށް ޖަވާބު ދެއްވަމުން މިނިސްޓަރު ވިދާޅުވީ، ރާއްޖޭގައި ބޭނުންކުރާ އޭޓީއާރު މަރުކާގެ ބޯޓުތައް އޮޕަރޭޓް ކުރުމަށް ބޮޑު ހަރަދެއް ހިނގާ ކަމަށެވެ. އަދި މިހާރު ވެސް ޓިކެޓް ވިއްކަނީ އޮޕަރޭޝަނަލް ހަރަދުތަކަށް ބަލާއިރު ބޮޑު ފައިދާއެއް ލާފައި ނޫން ކަމަށާއި، ބައިނަލްއަގުވާމީ ބާޒާރުގައި ތެލުގެ އަގު އުފުލުނު ނަމަވެސް ރާއްޖޭގެ ޓިކެޓްގެ އަގު ބޮޑުނުކޮށް ހިފަހައްޓާފައިވާ ކަމަށް އޭނާ ފާހަގަކުރެއްވިއެވެ.

Ad by Hajj Corporation

މިނިސްޓަރު ވިދާޅުވީ، ދުނިޔޭގެ އެހެން އެއާލައިންތަކުން ޓިކެޓްގެ އަގު 30 އާއި 40 އިންސައްތައާ ދެމެދުގެ މިންވަރަކަށް ބޮޑުކުރި ނަމަވެސް، ރައީސުލްޖުމްހޫރިއްޔާގެ ނިންމެވުމާ އެއްގޮތަށް ހަރަދުތައް މެނޭޖްކޮށްގެން ރައްޔިތުންނަށް އޭގެ ބުރަ ނުޖައްސާ އަގުތައް އެއްވަރެއްގައި ހިފެހެއްޓުމަކީ ވަރަށް އުނދަގޫ މަސައްކަތެއް ކަމަށެވެ. 

އަގު ހެޔޮކުރުމަށް އޮތް އެންމެ ބޮޑު ހުރަހަކީ ދަތުރުކުރާ މީހުންގެ އަދަދު މަދުވުން ކަމުގައި މިނިސްޓަރު ވިދާޅުވިއެވެ.

ތެލުގެ އަގަށް އައި ބަދަލާ ގުޅިގެން ގައުމީ އެއާލައިން މޯލްޑިވިއަން އިން ވަނީ މިދިޔަ އޭޕްރިލް މަހު ފަތުރުވެރިންނަށް ވިއްކާ ޓިކެޓްގެ އަގު ބޮޑުކޮށްފައެވެ. އައިލެންޑް އޭވިއޭޝަނުން ބުނެފައިވާ ގޮތުގައި އެއީ އެއާޕޯޓުން ވިއްކާ ޖެޓްފިއުލްގެ އަގު 1.19 ޑޮލަރުން 1.99 ޑޮލަރަށް އުފުލުމާ ގުޅިގެން ގެނައި ބަދަލެކެވެ. ނަމަވެސް ދިވެހިންނަށް ވިއްކާ ޓިކެޓްގެ އަގު މިހާތަނަށް ބޮޑުކޮށްފައެއް ނުވެއެވެ.