މާލޭ ހުކުރު މިސްކިތުގެ މުންނާރު ބެލެހެއްޓުމުގައި ދިމާވާ އެންމެ ބޮޑު ގޮންޖެހުމަކީ ރަނގަޅު ކޮލިޓީގެ އުވަ ހޯދުން ކަމަށް މިނިސްޓަރ އޮފް އާޓްސް، ކަލްޗަރ އެންޑް ހެރިޓޭޖް ހީނާ ވަލީދު ވިދާޅުވެއްޖެއެވެ.

މިނިސްޓަރު މިހެން ވިދާޅުވީ ރައްޔިތުންގެ މަޖިލީހުގައި މިލަންދޫ ދާއިރާގެ މެންބަރު ޙަސަން މުފީދު ޢަބްދުލްޤާދިރު ކުރެއްވި ސުވާލަކަށް ޖަވާބު ދެއްވަމުންނެވެ.

Ad by Hajj Corporation

މިނިސްޓަރު ހީނާ ވިދާޅުވީ، މާލޭ ހުކުރު މިސްކިތުގެ މުންނާރަކީ މުޅި ޤައުމު ބަލައިގަންނަ ވަރަށް އާސާރީ ތަނެއް ކަމަށާއި، އެތަން ބަލަހައްޓަމުން ގެންދަނީ ވަކި މިންގަނޑުތަކަކަށް ބަލައިގެން ކަމަށެވެ. ނަމަވެސް، މުންނާރުގައި އުވަލުމުގެ މަސައްކަތް ކުރުމުގައި އެންމެ އެކަށީގެންވާ ފެންވަރުގެ އުވަ ހޯދުމަކީ މިހާރު ކުރިމަތިވާ އެންމެ ބޮޑު ދަތިކަން ކަމުގައި އެކަމަނާ ފާހަގަކުރެއްވިއެވެ.

އުވަލުމުގެ މަސައްކަތަށް މޫސުމީ ބަދަލުތަކުގެ ސަބަބުން ވެސް ގޮންޖެހުންތައް ކުރިމަތިވާ ކަމަށް މިނިސްޓަރު ވިދާޅުވިއެވެ. "އުވަލުމަށްފަހު އުވަ ހިކެން ނަގާ ވަގުތުތަކުގައި ބައެއްފަހަރު ވިއްސާރަވުމާއި މި ކަހަލަ ކަންތައްތައް ވެސް ކުރިމަތިވޭ،" ހީނާ ވިދާޅުވިއެވެ. އެހެންކަމުން މުންނާރުގައި އުވަލުމާއި ދޭންޖެހޭ ފަރުވާތައް ދިނުމުގެ މަސައްކަތް ކުރިއަށް ގެންދަނީ ވަކި މުއްދަތުތަކަކަށް ބަހާލައިގެން ކަމަށްވެސް ވިދާޅުވިއެވެ.

މާލޭ ހުކުރު މިސްކިތުގެ މުންނާރަކީ މީލާދީން 1675 ވަނަ އަހަރު އައްސުލްޠާން އިބްރާހީމް އިސްކަންދަރު (އެއްވަނަ) ބިނާކުރެއްވި ތަނެކެވެ. މިއީ ނަމާދަށް ބަންގިގޮވުމަށް ބިނާކުރެވުނު، ހިރިގަލުގެ ފަރުމާ ފާހަގަކޮށްލެވޭ ބިނާއެކެވެ. މުންނާރުގެ ބޭރު ފާރުގައި ރީތި ލިޔުންތަކާއި ކުރެހުންތައް ކަނޑާނަގާފައިވާއިރު، މިއީ ޔުނެސްކޯގެ ދުނިޔޭގެ ތަރިކައިގެ ވަގުތީ ލިސްޓުގައި ވެސް ހިމެނޭ ތަނެކެވެ.

މިނިސްޓަރު އިތުރަށް ވިދާޅުވީ، މުންނާރު ވަރަށް ބޮޑަށް ހަޑިވެ ނުވަތަ ހަލާކުވާނަމަ ޤައުމީ ތަރިކަ ރައްކާކުރާ މަރުކަޒުގެ ފަރާތުން އެތަން މަރާމާތުކޮށް ފަރުވާ ދިނުމުގެ މަސައްކަތް އަބަދުވެސް ކުރަމުންދާ ކަމަށެވެ. އަދި އެފަދަ އާސާރީ ތަންތަން މޮނިޓަރކުރުމުގެ މަސައްކަތް މެދުނުކެނޑި ކުރިއަށްދާނެ ކަމުގެ ޔަޤީންކަން މިނިސްޓަރު ދެއްވިއެވެ.