ޞިއްޙަތާ ގުޅުންހުރި އެންމެހައި ކަންކަން ފުރިހަމަކުރުމަކީ މި ސަރުކާރުން އެންމެ ބޮޑު އެއް އިސްކަމެއް ދެއްވާ ކަންތައް ކަމަށް ރައްޔިތުންގެ މަޖިލީހުގެ ހުޅުދޫ ދާއިރާގެ މެމްބަރު މުހައްމަދު ޝާހިދު (ޝާޑް) ވިދާޅުވެއްޖެއެވެ.

ރައްޔިތުންގެ މަޖިލީހުގައި ކުރިއަށްދިޔަ ބަޖެޓް ބަހުސްގައި ވާހަކަދައްކަވަމުން މެމްބަރު ޝާހިދު ވިދާޅުވީ، ދައުލަތުގެ ބަޖެޓުގެ ޖުމުލަ އަދަދަކީ 59.7 ބިލިއަން ރުފިޔާ ކަމަށާއި، އޭގެ ތެރެއިން ޚަރަދުވާނެ ކަމަށް ލަފާކުރެވެނީ 52.6 ބިލިއަން ރުފިޔާ ކަމަށެވެ. އަދި ހިލޭ އެހީއާއި އާމްދަނީގެ ގޮތުގައި 43.2 ބިލިއަން ރުފިޔާ ލިބޭނެ ކަމަށް ލަފާކުރެވިފައިވާ ކަމަށް ވެސް އޭނާ ފާހަގަކުރެއްވިއެވެ.

Ad by Hajj Corporation

ބަޖެޓުން އެކި ދާއިރާތަކަށް ޚަރަދުކުރުމަށް ކަނޑައަޅާފައިވާ މިންވަރުތަކަށް އަލިއަޅުއްވާލައްވަމުން ޝާހިދު ވިދާޅުވީ، ޞިއްޙީ ދާއިރާއަށް އެކަނިވެސް 10.2 ބިލިއަން ރުފިޔާ ޚާއްސަކުރެވިފައިވާ ކަމަށެވެ.

ރާއްޖޭގެ ރައްޔިތުންގެ އެންމެ ބޮޑު އެއް ކަންބޮޑުވުމަކީ އަބަދުވެސް ޞިއްޙީ ޚިދުމަތްތައް އެންމެ އެދެވޭ ގޮތުގައި ފޯރުކޮށްނުދެވޭ މައްސަލަކަން ފާހަގަކުރައްވައި ޝާހިދު ވިދާޅުވީ، މި ސަރުކާރުން ރައްޔިތުންގެ ދުޅަހެޔޮކަމަށް ވަރަށް ބޮޑު އަހައްމިއްޔަތުކަމެއް ދޭ ކަމަށެވެ. އެގޮތުން ޞިއްޙީ ޚިދުމަތް ފޯރުކޮށްދިނުމަށް ބޭނުންވާ ވަސީލަތްތަކާއި، ހަސްފަތާލުތަކާއި، ބޭހާއި، ޑޮކްޓަރުންނާއި ނަރުހުން ހޯދުމާއި އެ ފަރާތްތަކަށް ތަމްރީނު ދިނުން ފަދަ ޞިއްޙަތާ ގުޅުންހުރި ހުރިހާ ކަމަކީ މި ސަރުކާރުގެ އެންމެ ބޮޑު އެއް އިސްކަން ކަމަށް ވިދާޅުވިއެވެ.

މީގެއިތުރުން، ރައީސުލްޖުމްހޫރިއްޔާ ހުރިހާ ރައްޔިތުންގެ ޞިއްޙަތާ މެދު ވަރަށް ބޮޑަށް ވިސްނަވާ ކަމަށާއި، ބަޖެޓުން 10.2 ބިލިއަން ރުފިޔާގެ ބޮޑު އަދަދެއް ޞިއްޙީ ދާއިރާއަށް ޚާއްސަކުރެވިފައިވަނީ ދިވެހި ރައްޔިތުންގެ ޞިއްޙަތު ސަލާމަތްކުރުމަށްޓަކައި ކަމަށް ޝާހިދު ވިދާޅުވިއެވެ.