ޖަޕާނުން ރާއްޖެ އަންނަ ފަތުރުވެރިންގެ އަދަދު އިތުރު ކުރުމަށް، ރާއްޖެއިން ޖަޕާނަށް ކަނޑައަޅުއްވާފައި ހުންނަވާ ސަފީރު އަހުމަދު މަހްލޫފް ޖަޕާނުގެ ޓްރެވެލް އޭޖެންޓުގެ އެސޯސިއޭޝަނާއި މަޝްވަރާކޮށްފި އެވެ.

މަހުލޫފް ސޯޝަލް މީޑިއާ އަށް ދުކޮށްލެއްވި ޕޯސްޓެއްގައި ވިދާޅުވެފައި ވަނީ ޖަޕާން އެސޯސިއޭޝަން އޮފް ޓްރެވެލް އޭޖެންޓްސް (ޖާޓާ) ގެ ރައީސް ކުނިހަރު އެބިނާއާ އެކު ފަތުރުވެރިކަމާ ގުޅޭ މަޝްވަރާތަކެއް ކުރިޔަށް ގެންގޮސްފައިވާ ކަމަށެވެ. މި ދެބޭފުޅުންގެ ބައްދަލު ކުރައްވާ ދެއްކެވި ވާހަކަތަކުގެ ތެރޭގައި، ދެ ޤައުމުގެ މެދުގައި ފަތުރުވެރިކަމުގެ ގުޅުން އިތުރަށް ހަރުދަނާ ކުރުމަށް މަޝްވަރާ ކުރެއްވެވި އެވެ.
މިމަޝްވަރާތަކުގެ ތަފްސީލް ހިއްސާކުރައްވާ ސަފީރު މަޙްލޫފް ވިދާޅުވީ، ޖަޕާނު މާކެޓުގައި ރާއްޖެ އިޝްތިހާރު ކުރުމަށް މަޝްވަރާ ކުރެއްވެވި ކަމަށެވެ. މީގެ އިތުރުން އެ ގައުމުގެ ޓްރެވެލް އޭޖެންޓުންނާއި ރާއްޖޭގެ ޓްރެވެލް އޭޖެންޓުންގެ ގުޅުން ބަދަހި ކުރުމަށް މަޝްވަރާ ކުރެއްވި ކަމަށް ވެސް މަހުލޫފު ވިދާޅުވި އެވެ. މަހުލޫފް ވިދާޅުވީ މި ބައްދަލުވުމުގެ ސަބަބުން، ރާއްޖެއާއި ޖަޕާނާއި ދެމެދު ފަތުރުވެރިކަމުގެ ދައިރާއިން އިތުރަށް ގުޅުން ބަދަހިވާނެ ކަމަށް އުންމީދު ކުރައްވާ ކަމަށެވެ.

Ad by Hajj Corporation

މެދުއިރުމަތީގެ ހަނގުރާމައާ ގުޅިގެން ރާއްޖެ އަށް އަންނަ ފަތުރުވެރިންގެ އަދަދު މަދަވެފައިވާއިރު، ސަރުކާރުން އަންނަނީ ރާއްޖެ އަށް މަދުން ފަތުރުވެރިން އަންނަ މާކެޓްތައްބަލައި އެތަންތަނުން ފަތުރުވެރިން އިތުރު ކުރުމަށް މަސައްކަތްތަކެއް ކުރަމުންނެވެ.