ހިޔާ ފްލެޓްތައް ލިބިފައިވާ މީހުންގެ ދިރިއުޅުން މިހާރަށް ވުރެ، ތަނަވަސްކުރަން ބޯހިޔާވަހިކަމުގެ އެހެން ފުރުސަތުތަކެއް ހޯދައިދިނުމުގެ ވިސްނުން ސަރުކާރުގައި އެބަހުރި ކަމަށް ހައުސިން މިނިސްޓަރު ޑރ. އަބްދުﷲ މުއްތަލިބު ވިދާޅުވެއްޖެ އެވެ.

ހިޔާ ޓަވަރުތަކުގައި އަލަށް ހަރުކުރި ލިފްޓްތައް ރަސްމީކޮށް އިފްތިތާހު ކުރުމަށް ބޭއްވި ހަފްލާގައި ވާހަކަ ދައްކަވަމުން މިނިސްޓަރު  މުއްތަލިބް ވިދާޅުވީ ހިޔާ ފުލެޓެއްގެ ޓަވަރެއްގެ ރަށެއްގައި ދިރިއުޅޭހާ މީހުން ދިރިއުޅޭ ކަމަށެވެ. އެގޮތުން ކޮންމެ ޓަވަރެއްގައި ގާތްގަނޑަކަށް 2000 މީހުން ދިރިއުޅެމުންދާ ކަމަށް ވެސް މިނިސްޓަރަ ފާހަގަ ކުރެއްވެވި އެވެ.

Ad by Hajj Corporation

ހައުސިން މިނިސްޓަރު މުއްތަލިބު ވިދާޅުވީ ހިޔާ ފުލެޓްތަކުގެ ދެ ކޮޓަރީގެ ތަންތަނަށް އޭރު މީހުން ބަދަލުވި ނަމަވެސް މިހާރު، އެމީހުންނަށް ދަރިންލިބި ހާލަތު ބަދަލުވެފައިވާ ކަމަށެވެ. މިނިސްޓަރު ވިދާޅުވީ ބޯހިޔާވަހިކަން ދިނުމުގައި މިވަގުތު ބޯހިޔާވަހި ކަމެއް ނެތް މީހުންނަށް އިސްކަންދޭނެ ކަމަށެވެ. ނަމަވެސް ހިޔާގައި ދިރިއުޅޭ ފަރާތްތަކުގެ ދިރިއުޅުން އިތުރު ހަރުފަތަކަށް ގެންދިއުމަށްޓަކައި ސަރުކާރުގެ ވިސްނުން ހުރި ކަމަށް ވެސް މިނިސްޓަރު ވިދާޅުވި އެވެ.

ހިޔާގެ ދިރިއުޅޭ ރައްޔިތުންގެ ކަންބޮޑުވުންތައް ސަރުކާރަށް އިނގޭ ކަމަށާއި އެ ކަންބޮޑުވުންތަކަށް ހައްލު ހޯދައިދިނުމަށް، މަސައްކަތް ކުރައްވާނެ ކަމަށް މިނިސްޓަރު ވިދާޅުވި އެވެ. މިނިސްޓަރު ވިދާޅުވީ މިވަގުތު އެކަމުގެ ސީދާ ތަފްސީލު ނުދެއްވި ނަމަވެސް ވަށާޖެހޭ ހައްލެއް ހޯދައި ދިނުމަށް ސަރުކާރުން މަސައްކަތް ކުރާނެ ކަމަށެވެ.