ރާއްޖޭގެ އިގްތިސޯދު ހަލާކޮށްލީ އެމްޑީޕީން ކަމަށާއި ޑޮލަރުގެ މައްސަލަ އަށް ހައްލެއް ނައިސްގެން މި އުޅެނީ އެ ސަބަބާހުރެ ކަމަށް އިކޮނޮމިކް ޑިވެލޮޕްމަންޓް އެންޑް ޓްރޭޑް މުހައްމަދު ސައީދު ވިދާޅުވެއްޖެ އެވެ.

ސައީދު މި މޭރުމުން ވާހަކަ ދައްކަވާފައި ވަނީ ރައްޔިތުން މަޖިލީހުގެ ޖަލްސާގައި ހުޅުމާލޭ ދެކުނު ދާއިރާގެ މެމްބަރު ޑރ. އަހުމަދު ޝަމްހީދު ކުރެއްވެވި ސުވާލަކާ ގުޅިގެންނެވެ. އެމްޑީޕީ އަށް ނިސްބަތްވެ ވަޑައިގަންނަވާ މެމްބަރު ޝަމްހީދު، މިނިސްޓަރ ސައީދު ސުވާލު ކުރައްވަމުން ވިދާޅުވީ، ޑޮލަރު ބާޒާރުގައި ފުލޯޓް ނުކޮށް، ތަކެތީގެ އަގު މައްޗަށް އަރައިގެންދާއިރު، އަގުބޮޑުވާ ތަކެތީގެ ވިޔަފާރި އަށް ސަރުކާރުން ވަންނަނީ ކީއްވެތޯ އެވެ.

Ad by Hajj Corporation

މި ސުވާލަށް ޖަވާބު ދެއްވަމުން ސައީދު ވިދާޅުވީ ޑޮލަރުގައި ބޭންޑެއް އެޅުވީ އެމްޑީޕީ ސަރުކާރުން ކަމަށެވެ. އަދި އެމްޑީޕީ އަށް ވެރިކަން ލިބުނު ކޮންމެ ފަހަރަކު ވެސް ރާއްޖޭގެ "އިގްތިސޯދު ފުނޑާލާފައި" ވާ ކަމަށް ވެސް ސައީދު ވިދާޅުވި އެވެ. މިނިސްޓަރު އިތުރަށް ވިދާޅުވީ އެމްޑީޕީ ސަރުކާރުގައި މާލީ އިދާރާތަކަށް ގޮންޖަހާ، ގާނޫނު ސަސްބެންޑްކޮށް، ފައިސާ ޗާޕު ކުރުމުން މިހާލަތު އަންނާނެ ކަމަށް މާލީ އިދާރާތަކުން ބުނެފައިވާ ކަމަށެވެ. އަދި އެކަމާ ގުޅޭ ރިޕޯޓްތައް އެބަހުރި ކަމަށް ވެސް މިނިސްޓަރު ވިދާޅުވި އެވެ.

ސައީދު ވިދާޅުވީ އަގު ބޮޑުވާ ތަކެތި ބޭރު ބައެއް ލައްވާ ގެނައުމުގެ ބަދަލުގައި ސަރުކާރު ކުންފުނި އެސްޓީއޯ މެދުވެރިކޮށް ގެންނަ ކަމަށެވެ. އަދި ދިވެހި ރައްޔިތުން ކައިގެން ބޮއެގެންތޯ އުޅޭތޯ ބެލުމުގެ ޒިންމާ އަކީ ގައުމުގެ ވަލީއުލް އަމުރު ރައީސުލްޖުމްހޫރިއްޔާގެ ބޮލުގައި އެޅިފައިވާ ޒިންމާ އެއް ކަމަށް ވެސް ސައީދު ވިދާޅުވި އެވެ.

މިނިސްޓަރު ސައީދު ސުވާލަށް ޖަވާބު ދެއްވަމުން ދަނިކޮށް، ސުވާލު ކުރެއްވެވި މެމްބަރު ޝަމްހީދު ވަނީ މަޖިލީހުގެ ތަޅުން ދޫކުރައްވާ ވަޑައިގަންނަވާފަ އެވެ.