ފީފާ ވޯލްޑް ކަޕްގެ ގަދަ 16 ގައި މިސްރުގެ މައްޗަށް 3-2 އިން އާޖެންޓީނާ ކުރިހޯދި މެޗަކީ ފޯރިގަދަ ކުޅުމެއް ފެނިގެންދިޔަ މެޗެއް ނަމަވެސް، ރެފްރީގެ ނިންމުންތަކާ މެދު އުފެދުނު ބޮޑެތި ހިޔާލުތަފާތުވުންތަކުގެ ސަބަބުން މުޅި މެޗުގެ ނަތީޖާއަށް ވަނީ ހިޔަނި އެޅިފައެވެ. މި މެޗުން ބަލިވުމާއެކު މިސްރުގެ ޓީމުން ވަނީ ރެފްރީގެ ނިންމުންތަކަށް ވަރަށް ބޮޑަށް ފާޑުކިޔާފައެވެ.

މެޗުގެ 67 ވަނަ މިނެޓާ ހަމައަށް މިސްރުން 2-0 އިން ކުރީގައި އޮތް ނަމަވެސް، އެންމެ ފަހު ވަގުތު އާޖެންޓީނާއިން ވަނީ ކުޅުން ރަނގަޅުކޮށް ތިން ލަނޑު ޖަހާފައެވެ. އާޖެންޓީނާގެ ފުރަތަމަ ލަނޑު 79 ވަނަ މިނެޓުގައި ކްރިސްޓިއަން ރޮމޭރޯ ކާމިޔާބުކޮށްދިންއިރު، އޭގެ ހަތަރު މިނެޓު ފަހުން ލިއޮނަލް މެސީ ވަނީ ނަތީޖާ އެއްވަރުކޮށްދީފައެވެ. އަދި މެޗުގެ އިތުރު ވަގުތުގައި އެންޒޯ ފެނާންޑޭޒް ޖެހި ލަނޑާއެކު އާޖެންޓީނާ ވަނީ ކުއާޓާ ފައިނަލުން ޖާގަ ހޯދާފައެވެ.

Ad by Hajj Corporation

މިސްރުގެ ޓީމުން އެންމެ ބޮޑަށް ހިތްހަމަނުޖެހުން ފާޅުކުރީ މެޗުގެ 59 ވަނަ މިނެޓުގައި މުސްތަފާ ޒީކޯ ޖެހި ލަނޑު ވީއޭއާރުން ބަލައިނުގަތުމުންނެވެ. އެ ލަނޑު ބަލައިނުގަތީ އޭގެ ކުރިން ފައުލެއް ހިނގާފައިވާ ކަމަށް ބުނެއެވެ. މީގެ އިތުރުން، އާޖެންޓީނާ މޮޅުވި ލަނޑު ޖެހުމުގެ ކުރިން އެލެކްސިސް މެކް އެލިސްޓާ ފައުލް ކުރި ކަމަށް ވެސް މިސްރުގެ ކުޅުންތެރިން ވަނީ ބުނެފައެވެ.

މެޗަށްފަހު ވާހަކަދައްކަމުން މިސްރުގެ ކޯޗު ހުސާމް ހަސަން ބުނީ މެޗު ކުރިއަށްދިޔަ ގޮތާ މެދު އޭނާ އެއްވެސް ވަރަކަށް ހިތްހަމަނުޖެހޭ ކަމަށެވެ. "މި ނަތީޖާއަކީ އިންސާފުވެރި ނަތީޖާއެއް ކަމަށް އަހަރެން ގަބޫލެއް ނުކުރަން. މިއަދު އަހަރެމެންނަށް ކުރިމަތިވީ ބޮޑު ބޭއިންސާފަކާ،" ހަސަން ބުންޏެވެ.

މިސްރުގެ ފޯވާޑް މުސްތަފާ ޒީކޯ ވެސް ވަނީ ރެފްރީއަށް ވަރަށް ބޮޑަށް ފާޑުކިޔާފައެވެ. "މިއީ އިންސާފެއް ނޫން. މުޅި ގައުމެއްގެ މަސައްކަތް ރެފްރީ އެ ގެއްލުވާލީ. މެޗު ފެށުނީއްސުރެ އޭނާ ހުރީ އަހަރެމެންނާ ދެކޮޅަށް. މިއީ ރޭވިގެން ކުރިއަށްދާ ކަމެއް،" ޒީކޯ ބުންޏެވެ.

މި މޮޅާއެކު އާޖެންޓީނާ ކުއާޓާ ފައިނަލަށް ދަތުރުކޮށްފައިވާއިރު، އެ ބުރުގައި އެޓީމު ބައްދަލުކުރަން ޖެހޭނީ ސްވިޒަލޭންޑާއެވެ. ނަމަވެސް މިސްރު މެޗުގެ މައްސަލަ ވެގެން ގޮސްފައިވަނީ މި ފަހަރުގެ މުބާރާތުގައި މިހާތަނަށް ފެނިގެންދިޔަ އެންމެ ބޮޑު އެއް މައްސަލައަށެވެ.