ދުނިޔޭގެ މަޝްހޫރު ފުޓްބޯޅަ ތަރި ލިއޮނަލް މެސީ، ސްޕެއިންގެ މެޑްރިޑް ސަރަހައްދުގައި ރޯވި ނުރައްކާތެރި އަލިފާނުގެ ހާދިސާތަކުގައި ގެއްލުން ލިބުނު ރަށްފުށުގެ ސަރަހައްދުތައް އަލުން އާރާސްތުކުރުމަށް 88،000 އެމެރިކާ ޑޮލަރު ހަދިޔާކޮށްފިއެވެ. މިއީ އެ ސަރަހައްދުގެ ރައްޔިތުންނަށް ލިބުނު ބޮޑު ހިތްވަރެއްގެ ގޮތުގައި ގިނަ ބަޔަކު ދަނީ ސިފަކުރަމުންނެވެ.

މެޑްރިޑްގެ ރީޖަނަލް ޕްރެޒިޑެންޓް އިސަބެލް ޑިއާޒް އަޔޫސޯ އެކްސްގައި ކުރެއްވި ޕޯސްޓެއްގައި މި އެހީގެ ޚަބަރު ކަށަވަރުކޮށްދެއްވަމުން ވިދާޅުވީ، "މެސީއަށް ހައްގުވާ އަތްތިލަބަޑީގެ ސަލާމް އެރުވުމަށް އޭނާއަށް މަރުހަބާ ކިޔުމަށް މެޑްރިޑުން މިތިބީ ކެތްމަދުވެފައި" ކަމަށެވެ. މި އެހީއަކީ ހަމައެކަނި މާލީ އެހީއެއްގެ އިތުރުން، ހާލުގައި ޖެހިފައިވާ މުޖުތަމައުތަކާއެކު މެސީ ހުރިކަން ހާމަކޮށްދޭ އިންސާނީ ރީތި ނަމޫނާއެކެވެ.

Ad by Hajj Corporation

މެޑްރިޑްގެ ހުޅަނގު ސަރަހައްދުގައި ރޯވި މި އަލިފާނުގެ ހާދިސާގައި ގާތްގަނޑަކަށް 75،000 އޭކަރުގެ ބިން ވަނީ އަނދާފައެވެ. ސަރަހައްދީ ސަރުކާރުން މިހާރު ވަނީ ގެއްލުން ލިބުނު މުނިސިޕަލްޓީތަކަށް އެހީތެރިވުމަށް ޚާއްސަ ޑޮނޭޝަން ޕްލެޓްފޯމެއް ލޯންޗުކޮށްފައެވެ. މިއީ އަމިއްލަ ފަރާތްތަކާއި ކުންފުނިތަކަށް ރައްކާތެރިކަމާއެކު އެހީ ފޯރުކޮށްދެވޭނެ އިންތިޒާމެކެވެ.

މިއީ މެސީ މިފަދަ ބޮޑު އެހީއެއް ފޯރުކޮށްދިން ފުރަތަމަ ފަހަރެއް ނޫނެވެ. 2007 ވަނަ އަހަރު އުފެއްދި ލިއޯ މެސީ ފައުންޑޭޝަން މެދުވެރިކޮށް އޭނާ ދަނީ ސިއްހީ، ތައުލީމީ އަދި ކުޅިވަރުގެ ދާއިރާއިން ނިކަމެތި ކުދިންނަށް އެހީތެރިވަމުންނެވެ. އެގޮތުން ކޮވިޑް-19 ގެ ދުވަސްވަރު އާޖެންޓީނާގެ ހޮސްޕިޓަލްތަކަށް 550،000 ޑޮލަރު އަދި ބާސެލޯނާގެ ހޮސްޕިޓަލްތަކަށް 1.1 މިލިއަން ޑޮލަރު އޭނާ ހަދިޔާކޮށްފައިވެއެވެ.

މީގެ އިތުރުން، 2010 ވަނަ އަހަރުން ފެށިގެން ޔުނިސެފްގެ ގުޑްވިލް އެމްބަސެޑަރެއްގެ ގޮތުގައި ހުރި މެސީ ވަނީ ހައިޓީއަށް އައި ބިންހެލުމާއި، ސޫރިޔާގެ ހަނގުރާމައިގެ އަސަރުކުރި ކުދިންނަށް އެހީތެރިވުމަށް ގިނަ މަސައްކަތްތަކެއް ކޮށްފައެވެ. އަދި ދާދި ފަހުން ވެނެޒުއޭލާއަށް އައި ބިންހެލުމާ ގުޅިގެން ހިންގި އެހީގެ ހަރަކާތްތަކުގައިވެސް މެސީއާއި އޭނާގެ އަނބިކަނބަލުން އެންޓޮނެލާ ރޮކޫޒޯ ވަނީ އިސް ދައުރެއް އަދާކޮށްފައެވެ.