ކުޑަކުދިން ހެދިބޮޑުވާގޮތް ބަލައި ފަރުވާ ދިނުމުގެ ދާއިރާއިން ޚާއްޞަ ސްޕެޝަލިސްޓެއްގެ ގޮތުގައި ރާއްޖޭގައި ޚިދުމަތްކޮށްދެއްވަން ފެށްޓެވި ފުރަތަމަ ދިވެހި ޑޮކްޓަރު، މަރްޙޫމާ ޑރ. އާމިނަތު ފަޒުނާ ނިޔާވުމުގެ ހިތާމައިގައި ރައީސުލްޖުމްހޫރިއްޔާ ތަޢުޒިޔާ ވިދާޅުވެއްޖެއެވެ.

ރައީސުލްޖުމްހޫރިއްޔާ މިއަދު ކުރެއްވި އެކްސް ޕޯސްޓެއްގައި، ޑރ. ފަޒުނާ އަވަހާރަވުމުގެ ހިތާމައިގައި ބައިވެރިވެވަޑައިގެން، ފަޒުނާގެ ޢާއިލާއަށް ވަނީ ތަޢުޒިޔާ ފޮނުއްވާފައެވެ. އަދި މީގެ އިތުރުން ދަރުމަވަންތަ ހޮސްޕިޓަލާއި، އައި.ޖީ.އެމް.އެޗްގެ ހުރިހާ މުވައްޒަފުންނަށާއި، ރާއްޖޭގެ ޞިއްޙީ ދާއިރާގައި މަސައްކަތްކުރައްވާ ހުރިހާ ފަރާތްތަކަށްވެސް ރައީސް ވަނީ އިޚްލާޞްތެރިކަމާއެކު ތަޢުޒިޔާ ދަންނަވާފައެވެ.

Ad by Hajj Corporation

ރައީސްގެ މެސެޖު ނިންމަވާލައްވާފައިވަނީ މަރްޙޫމާ ޑރ. އާމިނަތު ފަޒްނާއަށް ސުވަރުގޭގެ ދާއިމީ ނިޢުމަތް މިންވަރުކޮށްދެއްވައި، މާތްﷲގެ ތަނަވަސް ރަޙްމަތުގައި ލަހައްޓެވުން އެދި ދުޢާ ދަންނަވަމުންނެވެ.

"މަރްޙޫމާ ޑރ. އާމިނަތު ފަޒްނާއަށް ސުވަރުގޭގެ ދާއިމީ ނިޢުމަތް މިންވަރުކޮށްދެއްވައި، މާތްﷲގެ ތަނަވަސް ރަޙްމަތުގައި ލަހައްޓަވާށި! އާމީން،" ރައީސް ވިދާޅުވިއެވެ.

ޑރ. އާމިނަތު ފަޒުނާއަކީ ކުޑަކުދިންގެ ހެދިބޮޑުވުމުގެ އެކި މައްސަލަތަކާއި (އޯޓިޒަމް އަދި އޭ.ޑީ.އެޗް.ޑީ ފަދަ ކަންކަން) ދެނެގަނެ ފަރުވާދިނުމުގައި ރާއްޖޭގައި އެންމެ ފުރަތަމަ ސުޕަޝެލިސްޓް ފެންވަރުގައި ޚިދުމަތް ދެއްވަން ފެއްޓެވި ފާހަގަކޮށްލެވޭ ޤާބިލު ޑޮކްޓަރެކެވެ. ފަޒުނާ ނިޔާވިއިރު އުމުރަކީ 47 އަހަރެވެ.