ޖަޕާނު މަހެއް ވިހާހެން ގާނޫނާއި ގަވާއިދާ ހިލާފަށް ވަޒީފާތައް ދިނީ އެމްޑީޕީ ސަރުކާރުން ކަމަށް ފޭދޫ ދާއިރާގެ މެންބަރު އިބްރާޙީމް ދީދީ (އައިބީ) ވިދާޅުވެއްޖެ އެވެ.

އައިބީ މިމޭރުމުން ވާހަކަ ދައްކަވާފައި ވަނީ ސަރުކާރުން ގަވައިދުތަކާ ހިލާފަށް މީހުން ވަޒީފާއިން ވަކިކުރަމުންދާ ކަމަށް ކެންދޫ ދާއިރާގެ މެމްބަރު މަޢުރޫފް ހުށަހެޅުއްވި ގަރާރަށް ވާހަކަ ދައްކަވަމުންނެވެ. އައިބީ ވިދާޅުވީ އެމްޑީޕީ ސަރުކާރު ބަދަލުވާން ކައިރިވެފައި ވަނިކޮށް މަސްވެރިންނާ ދަނޑުވެރިންނަށް އެތައް ބައިވަރު ވަޒީފާތަކެއް ދީފައިވާ ކަމަށެވެ. މިގޮތަށް ވަޒީފާ ދީފައި ވަނީ އެމީހުންތިބި ވަޒީފާތަކުން ވަކި ވުމަށް ހިތްވަރުދީގެން ކަމަށާއި މި ސަބަބާހުރެ ކުންފުނިތައް ނުހިންގޭ ވަރަށް މުވައްޒަފުން ގިނަ ވެފައިވާ ކަމަށް ވެސް މެމްބަރު ފާހަގަ ކުރެއްވެވި އެވެ.

Ad by Hajj Corporation

މިސަރުކާރު ވެރިކަމާ ހަވާލުވީމަ، ވަޒީފާތަކުގައި މީހުން ގިނަ ކަމަށް ބުނެ އެމްޑީޕީން ވާހަކަ ދައްކާފައިވާ ކަމަށާއި ވަޒީފާތަކުން މީހުން މަދުކުރުމަށް ގޮވާލަމުންދިޔައީ ވެސް އެމްޑީޕީން ކަމަށް އައިބީ ވިދާޅުވި އެވެ. އަދި މި ސަރުކާރުން މީހުން ވަކިކުރަމުން ދަނީ ގާނޫނާއި ގަވާއިދުގެ ތެރެއިން ކަމަށާއި މި ސަރުކާރުން އެއްވެސް މީހަކަށް ގެއްލުން ނުދޭނެ ކަމަށް ވެސް މެމްބަރު ވިދާޅުވި އެވެ.