މޯލްޑިވްސް ފިޝަރީޒް އެންޑް އޯޝަން ރިސޯސަސް މާކެޓިންގ އެންޑް އެކްސްޕޯޓިންގ ކޯޕަރޭޝަން (މިފްކޯ) އިން ކަނޑުއޮތްގިރި ފިޝް ވިލެޖުގައި ތަރައްޤީކުރި ހިކިމަސް ކާރުޚާނާއަކާއި އައިސް ޕްލާންޓެއް ރަސްމީކޮށް ހުޅުވައިފިއެވެ.

މިކަމަށްޓަކައި ކަނޑުއޮތްގިރީގައި ބޭއްވި ޚާއްޞަ ރަސްމިއްޔާތެއްގައި މި ދެ މަޝްރޫޢު އިފްތިތާޙްކޮށްދެއްވީ މިނިސްޓްރީ އޮފް ފިޝަރީޒް، އެގްރިކަލްޗަރ އެންޑް އޯޝަން ރިސޯސަސްގެ ސްޓޭޓް މިނިސްޓަރ މުޙައްމަދު މުއްޠަލިބެވެ. މި ރަސްމިއްޔާތުގައި މިފްކޯގެ ސީއީއޯ އަދި މެނޭޖިންގ ޑިރެކްޓަރ މުޙައްމަދު އަނަސްގެ އިތުރުން، ފިޝަރީޒް މިނިސްޓްރީއާއި މިފްކޯގެ އިސްވެރިން ބައިވެރިވެވަޑައިގަތެވެ.

Ad by Hajj Corporation

ކަނޑުއޮތްގިރީގައި މި ހުޅުވުނު ވަސީލަތްތަކަކީ މިފްކޯގެ ލޯކަލް ޕްރޮޑަކްޓްތައް ނުވަތަ އަމިއްލަ އުފެއްދުންތައް އިތުރުކޮށް ބާޒާރަށް ނެރުމަށް އެޅުނު ވަރަށް މުހިންމު ފިޔަވަޅެކެވެ. ޚާއްޞަކޮށް މާލެ ސަރަހައްދުގައި މިފަދަ ޚިދުމަތެއް ފެށުމަކީ، މާލޭގެ ފިހާރަތަކަށް މިފްކޯގެ އުފެއްދުންތައް ފޯރުކޮށްދިނުމުގައި މިހާރު ދިމާވާ ދަތިތަކަށް ބޮޑު ހައްލެއް ލިބިގެންދާނެ ކަމެއް ކަމަށް އެ ކުންފުނިން މަޢުލޫމާތުދެއެވެ.

މި އައު ހިކިމަސް ކާރުޚާނާއާއެކު މިފްކޯގެ އުފެއްދުންތެރިކަން އިތުރުވެ، ކަނޑުއޮތްގިރިން މަސްވެރިންނަށް ބޭނުންވާ އައިސް ފަސޭހަކަމާއެކު ލިބޭނެ އިންތިޒާމު މިހާރު ވަނީ ހަމަޖެހިފައެވެ. މިއީ ދިވެހި މަސްވެރިކަމުގެ ސިނާޢަތް ކުރިއެރުވުމަށް ސަރުކާރުން ކުރައްވަމުންދާ މަސައްކަތްތަކުގެ ދަށުން، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އިރުޝާދުގެ ދަށުން ކުރިއަށްގެންދިޔަ މުހިންމު މަޝްރޫޢެކެވެ.