މިއަހަރުގެ މިނިވަން ދުވަހުގެ މުނާސަބަތުގައި ފަންނާއި ސަގާފަތާއި ތަރިކައާ ބެހޭ ވުޒާރާއިން އިންތިޒާމުކޮށްގެން ބާއްވާ ޚާއްޞަ ހަރަކާތެއް ކަމަށްވާ "މިނިވަން ރަން" ރަސްމީކޮށް އިފްތިތާޙްކޮށްފިއެވެ.

މި ހަރަކާތް އިފްތިތާޙްކުރުމަށްޓަކައި މިއަދު ހަވީރު ފަންނާއި ސަގާފަތާއި ތަރިކައާ ބެހޭ ވުޒާރާގެ އިސްވަރު ހޯލުގައި ބޭއްވި ޚާއްޞަ ރަސްމިއްޔާތު ޝަރަފުވެރިކޮށްދެއްވީ އެ ވުޒާރާގެ ވަޒީރު ހީނާ ވަލީދު އެވެ.

Ad by Hajj Corporation

މި މަހުގެ 27 ވާ ހޮނިހިރު ދުވަހުގެ ހަވީރު ހުޅުމާލޭގައި ބޭއްވުމަށް ހަމަޖެހިފައިވާ މި ދުވުން އިންތިޒާމުކޮށް ކުރިއަށްގެންދިއުމަށްޓަކައި، "ވީރަން މޯލްޑިވްސް" އާއެކު މިއަދުގެ ހަފުލާގައި ވަނީ ތިން އަހަރު ދުވަހުގެ އެއްބަސްވުމެއްގައި ސޮއިކޮށްފައެވެ. މި އެއްބަސްވުމުގައި ވުޒާރާގެ ފަރާތުން ސޮއިކުރެއްވީ ސްޓޭޓް މިނިސްޓަރ އަޙްމަދު މުނާޒްއެވެ. ވީރަން މޯލްޑިވްސްގެ ފަރާތުން ސޮއިކުރެއްވީ އެ ޖަމްޢިއްޔާގެ މެނޭޖަރ ހައްވާ ނީލާ އެވެ.

"މިނިވަން ރަން" އަކީ ސަރުކާރުގެ މުއައްސަސާތަކާއި، ކުލަބު ޖަމްޢިއްޔާތަކުގެ އިތުރުން އާންމު ފަރުދުންނަށްވެސް ބައިވެރިވެވޭ ގޮތަށް ހުޅުވާލައިގެން ބާއްވާ ހަރަކާތެކެވެ. މި ހަރަކާތުގެ މައިގަނޑު މަޤްޞަދަކީ މިނިވަން ދުވަހުގެ އުފާފާޅުކުރުމުގެ ތެރެއިން ޤައުމީ އެކުވެރިކަން އާލާކޮށް، ދުޅަހެޔޮ އަދި ހަރަކާތްތެރި ދިރިއުޅުމަކަށް ބާރުއެޅުމެވެ.

މިއަދުގެ ރަސްމިއްޔާތުގައި "ވީރަން އެޕް" ވެސް ވަނީ ތަޢާރަފުކޮށްފައެވެ. މި ދުވުމުގައި ބައިވެރިވާން ބޭނުންވާ ފަރާތްތަކަށް މިހާރުން ފެށިގެން އެ އެޕްލިކޭޝަން މެދުވެރިކޮށް ރަޖިސްޓްރީ ކުރެވޭނެ އިންތިޒާމު ވަނީ ހަމަޖައްސާފައެވެ.

މި ހަރަކާތުގައި ބައިވެރިވާ ވީރަން މޯލްޑިވްސް އަކީ ރާއްޖޭގެ އެކި ކަންކޮޅުތަކުގައި ދުވުމުގެ ތަފާތު އިވެންޓްތަކާއި ހަށިހެޔޮކަމުގެ ޕްރޮގްރާމްތައް ކާމިޔާބުކަމާއެކު ހިންގަމުން އަންނަ ތަޖުރިބާކާރު ޖަމްޢިއްޔާއެކެވެ.