ހުޅުމާލެ 2ވަނަ ފިޔަވަހީގެ ކަރަންޓުގެ ވިއުގަ އިތުރަށް ރަގަޅު ކުރުމަށް ޓެކްނިކަލް މަސައްކަތްތަކެއް ކުރުމަށް ނިންމާފައިވާތީ ކަރަންޓް ކެނޑިދާނެ ކަމަށް ސްޓޭޓް އިލެކްޓްރިކް ކޮންޕެނީ ލިމިޓެޑް، ސްޓެލްކޯއިން ބުނެފި އެވެ.

އެކުންފުނިން ބުނީ މި މަސައްކަތްތައް ކުރިއަށް ގެންދިއުމަށް ނިންމާފައި މި މަހުގެ 21 ވަނަ ދުވަހުން ފެށިގެން މި މަހުގެ ނިޔަލަށް ކަމަށެވެ.ސްޓެލްކޯއިން ބުނީ މި މަސައްކަތް ކުރިއަށްދާ ވަގުތުތަކުގައި ހުޅުމާލެ 2ވަނަ ފިޔަވަހީގެ އެކި ސަރަހައްދުތަކުން ކުޑަ ވަގުތުކޮޅަކަށް ކަރަންޓުގެ ޚިދުމަތް މެދުކެނޑުމަކީ އެކަށީގެންވާ ކަމެއް ކަމަށާއި މި މަސައްކަތުގެ ސަބަބުން ކަސްޓަމަރުންނަށް ދިމާވެދާނެ ދަތިތަކަށްޓަކައި އެ ކުންފުނިން މައާފަށް އެދޭ ކަމަށެވެ. މިފަދަ މަސައްކަތްތަކަކީ ދިގު މުއްދަތަކަށް ރައްޔިތުންނަށް ފޯރުކޮށްދޭ ޚިދުމަތުގެ ފެންވަރު ރަނގަޅުކުރުމަށް ކުރާ ކަމަކަށްވާތީ މިކަމުގައި ކަސްޓަމަރުންގެ ފަރާތުން ލިބޭ އެއްބާރުލުމަށް ސްޓެލްކޯއިން ވަނީ ޝުކުރު ވެސް އަދާ ކޮށްފަ އެވެ.

އެކުންފުނިން ބުނީ މި މަސައްކަތަކީ ހުޅުމާލެ 2ވަނަ ފިޔަވަހީގެ ކަރަންޓުގެ ވިއުގަ ބެލެހެއްޓުން އެ ކުންފުންޏާއި ރަސްމީކޮށް ހަވާލުކުރުމާއި ގުޅިގެން އެ ސަރަހައްދުގެ ކަރަންޓުގެ ޚިދުމަތުގެ ފެންވަރު މަތިކުރުމަށް ކުރަމުންދާ މަސައްކަތަކެއް ކަމަށެވެ.ހުޅުމާލެ ދެވަނަ ފިޔަވަހީގެ ކަރަންޓުގެ ނެޓްވޯކާ ސްޓެލްކޯއިން ހަވާލުވެފައިވަނީ މިދިޔަ މަހު އެވެ. މާލެ ސަރަޙައްދުގެ ކަރަންޓުގެ ހާލަތު ރަނގަޅު ކުރުމަށް ސްޓެލްކޯއިން އަންނަނީ، މަސައްކަތް ކުރަމުން އަންނަ ކަމަށާއި އެގޮތުން ހުޅުމާލޭގައި ޤާއިމްކޮށްފައިވާ 50 މެގަވޮޓުގެ އިންޖީނުގޭގެ ޕަވަރ ސިސްޓަމް އަޕްގްރޭޑް ކުރުމުގެ މަސައްކަތްވެސް ފަށާއފައިވާ ކަމަށް ސްޓްލްކޯއިން މައުލޫމާތުދެ އެވެ.

Ad by Hajj Corporation