މުޅި ރާއްޖޭގެ ޔޫޓިލިޓީގެ ހިދުމަތް ފޯރުކޮށްދިނުމަށްޓަކައި ސާވޭކުރުމުގެ މަސައްކަތް ސްޓެލްކޯއިން ފަށައިފި އެވެ.

ސަރުކާރުންވަނީ ފެނަކަ އުވާލައި، ރާއްޖޭގެ ހުރިހާ ރަށެއްގެ ޔޫޓިލިޓީގެ ޚިދުމަތް ސްޓެލްކޯގެ ދަށުން ފޯރުކޮށްދިނުމަށް ނިންމަވާފަ އެވެ.

Ad by Hajj Corporation

ރަށްރަށަށް ޔޫޓިލިޓީގެ ހިދުމަތް ދެމުންދިޔަ ފެނަކަ އުވާލުމަށް ނިންމާ، އެ ޚިދުމަތް ސްޓެލްކޯގެ ދަށުން ދިނުމަށް ނިންމެވިކަން ރައީސުލްޖުމްހޫރިއްޔާ ޢިއުލާންކުރެއްވީ މިމަހުގެ 7 ވަނަ ދުވަހު އެވެ. އެ ނިންމެވުމާ ގުޅިގެން ސްޓެލްކޯއިން އަންނަނީ ރާއްޖޭގެ ހުރިހާ ރަށަކަށް ޔޫޓިލިޓީގެ ހިދުމަތް ދިނުމަށް ތައްޔާރުވަމުންނެވެ. އެގޮތުން، އަލަށް އެ ކުންފުންޏާ ހަވާލުވާ ރަށްރަށުގެ ހާލަތު ދެނެގަތުމުގެ ސަރވޭތައް މިހާރު ކުރަމުންދާ ކަމަށާއި، އޭގެ ތެރެއިން ސްޓެލްކޯގެ ޓީމުތަކުން އައްޑޫ ސިޓީއާއި ތިނަދޫ ސިޓީގެ ޔޫޓިލިޓީގެ ޚިދުމަތްތަކާ ބެހޭ ސަރވޭތައް ކުރަމުންދާކަމަށް އެ ކުންފުނިން ވިދާޅުވެ އެވެ.

ފެނަކަ އުވާލައި ސްޓެލްކޯގެ ދަށަށް އެ މަސައްކަތް ގެނައުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނިންމެވީ ސަރުކާރުގެ ކުންފުނިތަކުގެ ހިންގުން ހަރުދަނާކުރުމަށް އަޅުއްވާ ފިޔަވަޅެއްގެ ގޮތުންނެވެ. ކުރީ ސަރުކާރުތަކުން ކުންފުނިތަކަށް ބޭނުންވާ ވަރަށްވުރެ އިތުރަށް މުވައްޒަފުން ނެގުމުގެ ސަބަބުން ކުންފުނިތަކުގެ ހަރަދު ބޮޑުވެ، ހިންގުމަށް ބޮޑެތި ދަތިތަކާ ކުރިމަތިވެފައިވާ ކަމަށާއި، މި ބަދަލާއެކު، ކުންފުނިތަކުގެ މުވައްޒަފުންގެ އަދަދު މަދުކޮށް ހިންގުން މިހާރަށްވުރެ ހަރުދަނާ ކުރެވޭނެ ކަމަށް ސަރުކާރުން ވަނީ ބުނެފަ އެވެ.

ރާއްޖޭގެ ހުރިހާ ރަށެއް ސްޓެލްކޯގެ ދަށަށް ބަދަލުކުރުމުގެ ކުރިން ސަރުކާރުވަނީ 4 އަތޮޅެއްގެ ޔޫޓިލިޓީގެ ކަންކަން އެ ކުންފުންޏާ ހަވާލުކޮށްފަ އެވެ.