ރައީސް ޑރ. މުޙައްމަދު މުޢިއްޒުގެ ސަރުކާރުން ލާމަރުކަޒީ ނިޒާމުގެ ބާރުވެރިކަން ކަށަވަރު ކުރެއްވުމަށް ކުރެއްވި އަދި ކުރައްވަމުން ގެންދަވާ މަސައްކަތްޕުޅާ ގާތަށްވެސް އެމްޑީޕީގެ ވެރިކަންތަކުގައި މަސައްކަތް ކުރެވިފައި ނުވާކަމަށް ބާރަށު ދާއިރާގެ މެމްބަރު އިބްރާހިމް ޝުޖާއު މިއަދު ވިދާޅުވެއްޖެއެވެ.

Ad by Hajj Corporation

ޝުޖާއު މިފަދައިން ވިދާޅުވީ، ރައްޔިތުންގެ މަޖިލީހުގެ ހުޅުމާލޭ ދާއިރާގެ ކުރީގެ މެންބަރު އަލީ ނިޔާޒް ސޯޝަލް މީޑިއާގައި ކުރެއްވި ޕޯސްޓަކަށް ރައްދު ދެއްވަމުންނެވެ. އަލީ ނިޔާޒްގެ ޕޯސްޓުގައި ވަނީ އެމްޑީޕީގެ ގިނަ ކަންބޮޑުވުންތަކަކާއެކު ލާމަރުކަޒީ ކޮމިޓީގެ މެންބަރުން ލޯކަލް ގަވަރމަންޓް އޮތޯރިޓީ (އެލްޖީއޭ) އާ ބައްދަލުކުރަށްވާނެކަމަށް ވިދާޅުވެފައެވެ.

އަލީ ނިޔާޒަށް ރައްދު ދެއްވަމުން ޝުޖާއު ވިދާޅުވީ، ނިޔާޒަކީ 19 ވަނަ މަޖިލީހުގެ ލާމަރުކަޒީ ކޮމިޓީގެ މުޤައްރިރުގެ ގޮތުގައި ހުންނެވި ބޭފުޅާ ކަމަށާއި، ނަމަވެސް އެމްޑީޕީގެ ސަރުކާރުގައި މުޅި ނިޒާމު ފުޑާލާ، ޤާނޫނުން ދީފައިވާ ބާރުތައް މުށުތެރެއަށް ލައިގެން ވެރިކަން ހިންގަމުން ދިޔައިރު އެކަމާ ދެކޮޅަށް އެއްވެސް ވާހަކައެއް ދައްކަވާފައި ނުވާ ކަމަށެވެ.

"ރައީސް ޑރ. މުޢިއްޒު މިނިޒާމުގެ ބާރުވެރިކަން ކަށަވަރު ކުރެއްވުމަށް ކުރެއްވި އަދި ކުރައްވަމުން ގެންދަވާ މަސައްކަތްޕުޅާ ގާތަށްވެސް ތިބޭފުޅުންގެ ވެރިކަން ތަކުގައި މަސައްކަތް ކުރެވިފައި ނުވޭ!"ޝުޖާއު ވިދާޅުވިއެވެ.

ޝުޖާއު އިތުރަށް ވިދާޅުވީ، ކުރީގެ ސަރުކާރުން ލާމަރުކަޒީ ނިޒާމުގެ ބާރުތައް ހިފަހައްޓާފައި އޮތް އިރު، އެ ވާހަކަތައް ކަންފަތްޕުޅާ ހަމައަށް ގެންދިއުމުންވެސް ނިޔާޒު ހުންނެވީ ހަނު ކަމަށެވެ. އެހެންކަމުން މިހާރު ނުކުމެ ލާމަރުކަޒީ ނިޒާމުގެ ވާހަކަ ދެއްކުމަކީ ލަދުވެތި ކަމެއްގެ ގޮތުގައި ޝުޖާއު ސިފަކުރެއްވިއެވެ.