ހުޅުމާލެ ފުރަތަމަ ފިޔަވަހީގައި ހުންނަ ރަށު މާރުކޭޓު ސަރަހައްދުގައި ޤަވާއިދާ ޚިލާފަށް އުޅެމުންދިޔަ 20 ބިދޭސީއަކު އިމިގްރޭޝަންގެ ބެލުމުގެ ދަށަށް ގެންގޮސްފައިވާ ކަމަށް އެއިދާރާއިން ބުނެފި އެވެ.

މި ބިދޭސީން އިމިގްރޭޝަންގެ ބެލުމުގެ ދަށަށް ގެންދިޔައީ ޤަވާއިދާ ޚިލާފަށް އުޅެމުންދާ ބިދޭސީންގެ މައްސަލަ ހައްލުކުރުމަށް އެއިދާރާ ހިމެނެހޭން އެކުލަވާލާފައިވާ ޓާސްކްފޯހުން ކުރިއަށް ގެންދިޔަ ހާއްސަ ހަރަކާތެއްގެ ތެރެއިން އެވެ.

Ad by Hajj Corporation

އިމިގްރޭޝަނުން ހިންގި ބަލާފާސްކުރުމުގެ ހަރަކާތުގެ ތެރެއިން އެ ސަރަހައްދުގައި ހަރަކާތްތެރިވަމުން ދިޔަ 55 ބިދޭސީއެއް ހުއްޓުވައިއެމީހުން މަސައްކަތް ކުރަމުންދަނީ ޤަވާއިދާ އެއްގޮތަށްތޯ ބަލާފައިވެ އެވެ. އިމިގްރޭޝަނުން ބުނީ އެއިދާރާއިން ބެލި ބެލުމުގައި އެ ސަރަހައްދުގައި 20 ބިދޭސީއަކު ޤަވާއިދާ ޚިލާފަށް ހަރަކާތްތެރިވަމުން ދިޔަ ކަމަށެވެ. މިގޮތަށް ޤަވާއިދާ ޚިލާފަށް މަސައްކަތް ކުރަމުން ދިޔަ ހުރިހާ ބިދޭސީން އިމިގްރޭޝަންގެ ބެލުމުގެ ދަށަށް ވަނީ ގެންގޮސްފަ އެވެ.

ޤަވާއިދާ ޚިލާފަށް އުޅޭ ބިދޭސީންގެ މައްސަލަ ރިޕޯޓް ކުރުމަށް "އިމިގްރޭޝަން ވޮޗް"ގެ ނަމުގައި ޚާއްސަ އޮންލައިން ޕްލެޓްފޯމެއް ވެސް އިމްގްރޭޝަނުން ވަނީ އިފްތިތާޙުކޮށްފަ އެވެ. ޤަވާއިދާ ޚިލާފަށް އުޅޭ ބިދޭސީންގެ މައްސަލައެއް ފާހަގަވެއްޖެނަމަ އަވަހަށް ރިޕޯޓް ކުރުމަށް ވެސް އިމިގްރޭޝަނުން އިލްތިމާސްކުރެ އެވެ.