މިނިވަންކަމަކީ ހަމައެކަނި ވަކި ދުވަހަކު ފާހަގަކޮށްލާ އުފާވެރިކަމެއް ނޫނެވެ. އެއީ ޤައުމެއްގެ ދިރިހުރުމާއި، އެ ޤައުމެއްގެ ރައްޔިތުންގެ އަމިއްލަވަންތަކަމާ ގުޅިފައިވާ ވަށައިޖެހޭ ބޮޑު މަފްހޫމެކެވެ. ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަހަރުގެ މިނިވަން ދުވަހު ދެއްވި ޚިޠާބެއްގައި ފާހަގަކުރެއްވި ފަދައިން، ޙަޤީޤީ މިނިވަންކަމަކީ ހަމައެކަނި ސިޔާސީ ގޮތުން ލިބޭ މިނިވަންކަމެއް ނޫނެވެ. އެއީ އިޤްތިޞާދީ، އިޖުތިމާޢީ އަދި ޚާރިޖީ ގޮތުންވެސް ޤައުމަށް ލިބިގެންވާ ފުރިހަމަ އިޚްތިޔާރެވެ.

މިކަން އޮޅުވާލަން މަސައްކަތްކުރަނީ އިދިކޮޅުންނެވެ. ރައީސްގެ ޚިޠާބަށް ބައެއް އިދިކޮޅީން ކީ އޮއްޓަރެއްނެތް ފާޑަކީ މީގެ މިސާލެވެ.

Ad by Hajj Corporation

ރައީސްގެ ފުރިހަމަ ޚިޠާބުގެ ވާހަކަތައް ހަގީގަތާއި ދުރަށް އިދިކޮޅުން ގެންދަން އުޅުނަސް އެދުވަހު ރައީސް ދެއްވީ މާނަފުން ބާރުގަދަ މެސެޖެކެވެ. އެވާހަކަފުޅަށް ޚުލާޞާގޮތެއްގައި ވިސްނުން ހިންގައިލާނަމެވެ.

މިނިވަންކަމަކީ ވަށައިޖެހޭ ކަމެއް، އޭގެ ތެރޭގައި ދާޚިލީ އަދި ޚާރިޖީ މިނިވަންކަން ވެސް ހިމެނޭ

މިނިވަންކަމަކީ ވަށައިޖެހޭ ކަމެއްގެ ގޮތުގައި މާނަކުރާއިރު، އޭގެ ތެރޭގައި ދާޚިލީ އަދި ޚާރިޖީ މިނިވަންކަން ހިމެނެއެވެ. ޤައުމެއްގެ ދާޚިލީ ކަންކަން ނިންމުމުގައި ބޭރުގެ އެއްވެސް ނުފޫޒެއް ނެތި، ރައްޔިތުންގެ ލާބައާއި މަންފާއަށް އިސްކަންދީގެން ކަންކަން ނިންމުމުގެ ޤާބިލުކަން ހުރުމަކީ މިނިވަންކަމުގެ މުހިންމު ބައެކެވެ. ހަމައެހެންމެ، އިޖުތިމާޢީ ގޮތުންނާއި ތަރައްޤީގެ ގޮތުން ޤައުމު ބިނާކުރުމުގައި އަމިއްލަ ފައިމައްޗަށް ތެދުވެ ތިބުމަކީ ވަށައިޖެހޭ މިނިވަންކަމުގެ ތަނބެކެވެ.

ޚާރިޖީ ސިޔާސަތާއި 'މޯލްޑިވްސް ފަސްޓް'

ދިވެހިރާއްޖޭގެ ޚާރިޖީ ސިޔާސަތު ބައްޓަންކުރުމުގައި 'މޯލްޑިވްސް ފަސްޓް' ނުވަތަ ދިވެހީން އިސްކުރުމުގެ ސިޔާސަތަކީ މިނިވަންކަން ދެމެހެއްޓުމަށް އެޅޭ އެންމެ މުހިންމު ފިޔަވަޅެވެ. މާޒީގައި ރާއްޖޭގެ ޚާރިޖީ ގުޅުންތައް ވަކި ފަރާތްތަކަކަށް ބުރަވެ، އިސްލާމީ އުންމަތުގެ ޤައުމުތަކާ ދުރުވެފައި އޮތް އޮތުން ބަދަލުކޮށް، ހުރިހާ ޤައުމުތަކާއެކު ހަމަހަމަ ގުޅުމެއް ބޭއްވުމަކީ މުސްތަޤިއްލުކަން ކަށަވަރުކޮށްދޭ ކަމެކެވެ. އިޒްރޭލު ފިޔަވައި، ރާއްޖޭގެ އިޙްތިރާމާއި މިނިވަންކަމަށް ޤަދަރުކުރާ ކޮންމެ ޤައުމަކާއެކު ގާތް ގުޅުމެއް ބޭއްވުމަކީ މި ސަރުކާރުގެ އަމާޒެވެ.

އިޤްތިޞާދީ މިނިވަންކަމާއި މުސްތަޤްބަލް

ޤައުމެއްގެ މިނިވަންކަން ޙަޤީޤީ މާނައިގައި އިޙްސާސް ކުރެވޭނީ އެ ޤައުމެއްގެ އިޤްތިޞާދު ބޭރުގެ ފަރާތްތަކަށް ބަރޯސާވާ މިންވަރު ކުޑަވެގެންނެވެ. ރައީސް މުޢިއްޒު ފާހަގަކުރެއްވި ގޮތުގައި، އަންނާން އޮތް ޖީލުތަކަށް 'ދިވެހީންގެ ރާއްޖެ' އެގޮތުގައި ފޯރުކޮށްދިނުމަށްޓަކައި، އިޤްތިޞާދީ ގޮތުން އަމިއްލަ ފައިމައްޗަށް ތެދުވުމަކީ ކޮންމެހެން ކުރަންޖެހޭ ކަމެކެވެ. މީގެ ތެރޭގައި ދައުލަތުގެ ދަރަނި މެނޭޖްކުރުމާއި، އާމްދަނީ އިތުރުކުރެވޭނެ އައު ވަސީލަތްތައް ހޯދުން ހިމެނެއެވެ.

ޑިމޮކްރަސީއާއި ސިޔާސީ މިނިވަންކަން

މިހާރު ރާއްޖޭގައި އޮތް ޑިމޮކްރެޓިކް ނިޒާމުގެ ތެރެއިން ސިޔާސީ ހަރަކާތްތަކަށް ލިބިދީފައިވާ މިނިވަންކަމަކީ ފާހަގަކޮށްލަންޖެހޭ ކަމެކެވެ. އިދިކޮޅު ފަރާތްތަކަށް ފާޑުކިޔުމާއި، ޚިޔާލު ފާޅުކުރުމުގެ ފުރުސަތު އެއްވެސް ހުރަހެއް ނެތި ލިބިދިނުމަކީ ދައުލަތުގެ މުއައްސަސާތަކުގެ މިނިވަންކަން ދޭހަކޮށްދޭ ހެއްކެކެވެ. ތެދު ޙަޤީޤަތް ބަޔާންކުރުމުން އެކަން ގަބޫލުކުރަން ދަތިވިޔަސް، ޤައުމުގެ އިޞްލާޙީ މަސައްކަތުގައި އިޚްލާޞްތެރިކަން އިސްކުރުމަކީ މިނިވަންކަން ދެމެހެއްޓުމުގެ އަސާސެވެ.

މިނިވަންކަމަކީ ހަމައެކަނި ނަމެއްގައި އޮންނަ އެއްޗަކަށް ވެގެން ނުވާނެ

މިނިވަންކަމަކީ ހަމައެކަނި ނަމެއްގައި އޮންނަ އެއްޗަކަށް ވެގެން ނުވާނެއެވެ. އެއީ ޤައުމުގެ ހުރިހާ ދާއިރާއަކުން ފެންނަން އޮންނަންޖެހޭ، ވަށައިޖެހޭ ފުރިހަމަ ނިޒާމެކެވެ. ޚާރިޖީ ސިޔާސަތުން ފެށިގެން ދާޚިލީ ކަންކަމާ ހަމައަށް 'ދިވެހީން އިސްކުރުން' މިއީ މިނިވަންކަމުގެ ޙަޤީޤީ ރޫޙެވެ. އަންނާން އޮތް ޖީލުތަކަށް އަމާނާތްތެރިކަމާއެކު މި ޤައުމު ފޯރުކޮށްދެވޭނީ، މި ދެންނެވި ވަށައިޖެހޭ މިނިވަންކަން ކަށަވަރުކޮށްގެންނެވެ.